والسلام

والسلام
اللى بينى وبينِك أغرَب مِ الكلام
حتى وانتِ بعيدة.. أقرب مِ المسَام
حتى فى الحنية قاسية
واما تقْسِى
بْتبقَى زى الطبطبة على ضَهر عيِّل
لجل يقرا وهُوَّه مش عايز علام
وقت أفراحِك بتبكِى
وقت حُزنِك مش بتشكِى
واما تحكِى
بتلومينى لو سرقتِك من عيون الناس
وبعد دقيقة واحدة
تستخَبِّى فْ طرْف كُمِّى
خايفة مِ الناس والملام
لخبطة بنعيشها لكن مش مُهِم
المهم انِّى باحبِّك والسلام