- فيه ايه شاغلك فى الموبايل كده يا أمينة كل الوقت ده، السوشيال ميديا واخداكى منى على طول كده؟
- أبداً ياخويا انا جايبة الآلة الحاسبة، معايا حسبة كده بحسب فيها!
- حسبة ايه يا امينة تكونيش ورثتى من ورايا؟
- أبدا يا خويا بحسب انا ليا عندك كام فلوس رضاعة!
- رضاعة إيه يا ولية يا خرفانة انتى؟!
- رضاعة عيالك ياخويا اللى خلفتهوملك وفضلت ارضع فيهم وانا زى الهبلة ومكنتش اعرف ان الرضاعة دى بفلوس وانت أكلتها عليا، لولاش الست ام القمصان الله يكرمها نورتنى!
- ههههههه الله يحظك يا يا أمينة اسمها ابو القمصان مش ام القمصان!
- مش مهم التفاصيل الصغيرة دى المهم انى فهمت قد ايه انت خمتنى يا سى السيد!
- طيب بلاش هزار ماسخ و قومى شوفى هتغدينا ايه!
- الست نهاد الله يكرم أصلها قالت مفيش اى مسند شعرى يجبرنى اطبخلك!
- ههههههههه قصدك سند شرعى مش مسند شعرى يا ولية!
- مش مهم التفاصيل المهم المعنى يا سى السيد شوف كام سنة وانا بطبخلك زى الهبلة تتغدى وتملا بطنك وبعد كده تروح تسهر بالليل مع زبيدة وجليلة العوالم بتوعك!
- اللهم طولك ياروح، ياولية اقصرى الشر وقومى احسنلك عشان بعد الغدا عايزك تكويلى جلابية نضيفة عندى مشوار مهم.
- هى الست ابو القمصان مجبتش سيرة المكوى لكن على سبيل الاحتياط مش كاويالك حاجة!
- طب استهدى بالله بدال ما اطين عيشتك يا امينة وبلاش تسمعى كلام الستات اللى بتخرب البيوت دى!
- اهو انتوا كده يا رجالة لما تلاقوا حد ينورنا ويفهمنا تقولوا عليه بيخرب البيوت.
- وياترى الست نهاد مقلتلكش كمان المفروض تاخدى اجرة على تنضيف البيت وكنسه ومسحه؟
- لا اللى قالت كده الست هبة قطب؟
- يا نهار اسود يا امينة هى حصلت انك تسمعى الست هبة قطب خبيرة الثقافة الجنسية؟
- تف من بقك ياسى السيد الست عمرها ماجابت سيرة حاجة وحشة وكل اللى قالته ان الراجل لو عايز مثلا بوسة من مراته ماينفعش يقولها هاتى بوسة لكن ممكن يتفق معها على كلمة سر!
- كلمة سر ايه يا ولية وكلام فارغ ايه يا ام العريف انتى وهبة قطب بتاعتك دى؟!
- يعنى حاجة مستغطية، يعنى يقولها بسبوسة بالقشطة مثلا!
- طب ما تسيبك من كلام الحيزبونات دول وقومى شوحيلنا حتة كبدة نتغدى بيها يا أمينة؟
- لا يا سى السيد الست نهاد ام القمصان قالت الست مش مجبورة تشوح كبدة لجوزها!
- طب بقولك إيه يا امينة بلاها كبدة وبلاها طبيخ ألاقيش عندك حتة بسبوسة بالقشطة؟
- تلاقى ياخويا بس ايدك على 100 جنيه !
- نهارك اسود يا امينة، يعنى عايزة فلوس رضاعة العيال قلنا ماشي، مش عايزة تشوحيلى حتة كبدة قلت آمين لكن هى حصلت أطلب منك بوسة تقوليلى هات 100 جنيه؟ اومال لو قولتلك قومى ارقصيلى؟
- لا دى مش اقل من 200 دولار نقطة ياخويا!
