■ كتب: بيرم التونسي
أفندى ظريف ودمه خفيف وباطه تحته خصايه .. بيطويها ويفردها كأنه حامل الراية .. ويرمى يمين ويرمى شمال بلا آخر ولا نهاية .. ويا ما غيره بيبحتر وياما غيره بيشحتر!
ودا بياكل بلح أمهات وده بياكل درة نيلي .. ودا شارى بصاغ ترمس وفوقه حلبة ومقيلي .. وواحد يرمى قشر الفول ويقول لك مهوش فولى .. وأخرتها تشوف الأرض منظر يخفى دا المنظر!
ودا بالبسكليت طاير فى وسط الزحمة والهيصة .. بيحسب روحه فى ميدان سباق الخيل وفي روضة .. يمزع فى هدوم ستات ويدعس فى بدل بيضه .. وإما يعور الأطفال يا هو ذاته يتعور !
ودا تفًاف ودا نفَاف ودا بينط ويضبع .. ودا ع الحيط وبالطباشير بيرسم دايره ومربع.. ودا يشاور لبعض الناس ويرمى النكتة ويهعهع .. ودا يزغد ودا يزاحم ودا يوقع ودا يكسر !
◄ اقرأ أيضًا | كنوز| حكاية بيرم التونسي مع كعك الست حنيفة
وده كييف معاه علبة وعلى طول ايده يحدفها .. وكل عامود بسله حديد وقدام عينه شايفها .. كأنه لو رمى فيها عماشه راح ينضفها .. جرائم أهل أوروبا عليها يكتبوا محضر !
في أوروبا بوليس مخصوص يراقب كل متعجرم .. وشايل دفتر الوصولات يغرم كل من أجرم .. غرامته بالخمس شلنات ولا يغفر ولا يرحم .. بوليس لو كان لنا مثله يجيب مليون جنيه واكتر !
