وش مبسوط بانتعاش
هو وشك
طفل راقد جنب ضله على الفراش
قصدى عشك
أعرفك مانتاش عارفني
أذكرك باسمك واسمي
واما تبكى أجرى أهشك
عارف انك طفل صامت
أخرتك تصرخ تواوي
ضحكتك من بدرى قامت
مين بيتحداك وناوي
يمنعك عن حضن أبوك
يجرى جنبك قال كهاوي
يغمزك بكلام رزين
قوله فين؟
قوله انك عارفه غاوي
يوم معاك واتنين عليك
والنهاردة جه مداوي
عارف انك مش فاهمني
بسمتك ديه صلاة
فاهم انك مش عارفني
والحياة عندك متاه
بكرة تكبر تبقى طولي
أو تطول عنى بطول
بكرة يتمناك لبكرة
بكرة عايزك شاب واعي
بين زمايلك فى الفصول
تقرا ناسك واللى فاتوا
تشترى فاسك معول
واللى باعك اجرى هاتوا
قرب قلبه جود وقول
انك ابنى
ابن ناس
يعنى متعلم أصول
لسه فارش بسمتك مطرح خدودك
لسه مش عارف أبوك
قولت أنّا
قولت تتا
طب فين جدودك ؟
بوصى فيك أجمل ما فيك
اوعى تكبر وتعاديني
اما أمك شيلها فوق
فوق شبابك
فوق عيالك
فوق مراتك
فوق حدود ملهوش حدود
دانت ليها كيف أبيك
نفسى أتمناك تعيش
ضعف اللى اعيشه
نفسى أكبر
وانت ثابت بالتمام
يتركك عداد زمانا
وابقى شايفك بانتظام
طفل لسه كلامه وااء
طفل ناسى اسم أبوه
طفل ضحكُه غير بُكا.
ابن متعلم أصول
