وانتوا بتاكلوا ف لحم اخواتكم
ضيفوا العيش والملح ما بينكم
ضيفوا كتير أوي من حواديتكم
من أسراركم
من حكاياتكم
من أحلامكم
صُبوا صواني الضحك قُبالكم
لجل الأكل يكون مظبوط
وانت بتاكُل لحم أخوك
كُل على مهلك
عييد أو زييد ف كلام مُستَهلَك
وضميرك لو صحي وندهلك
خلي بواقي حكايته في إيدك
زعَّق له وطلَّع عفاريتك
(هو يا عم دا كان من أهلك) ؟!!
ومتنساش لحن الخلفيه
المزيكا تحَفِّز قلبَك
على ضخ الكدب بحُريه
ما يضُرِّش لو كات أغنيه
عاشها معاك ف ليالي البهجه
سهره سعيده
فيلم ف سيما
ربطة كراڤته هديتهالو
ونسيت انها موضه قديمه
بلكونه وهتفت مع صوتكم
عاشت أدفا ايام ف يناير
شهقه وشاي عنَّاب وسجاير
ثومه
نجاة
فيروز
وسكوووت
سهرايه وكيكه وبسكوت
كلت خلاص ؟
شبعان ؟
مبسوط ؟؟
كُل لك منِّه لٌقمه كمان
واحبس بعده ب بُن محوج
ومتنساش قهوتُه كوبايه
مش فنجان
آخر قهوه شربها زمان
اللي شربها عشانك ساده
مع إنُه يحبَّها مـظبوط
وانت بتاكل لحم أخوك
كل على مهلك
