نشر خالد طارق .. بلوجر ومقدم محتوى دينى على السوشيال ميديا على صفحته الشخصية نصيحة للشباب، جاء فيها «أن اليأس بقى شبح بيحوم حوالين كتير من الشباب، يأس من قلة الفلوس، يأس من دعوة ربنا لسة مستجبش ليها وأشكال كتير تانية من اليأس، فى الحقيقة الموضوع أبسط من كده بكتير، اللى شبابنا مش فاهمينه إن اليأس مش هيزود ولا هينقص هو أنت يعنى لما تيأس وتكتئب الحال هيتغي؟ أكيد لا، لكن اللى ممكن فعلاً يغير الحال هو التوكل على الله وحسن الظن به سبحانه وتعالى».
اقرأ أيضًا | نصيحة بلوجر: الشباب لديهم فرصة لحل أزمة المناخ
وأضاف في تدوينته «اعرف دايماً أن المشاكل اللى بتحصل بتكون ابتلاء من ربنا بيختبر بيها صبرك وبيعرفك إن هو السند والعون الوحيد ليك فى رحلتك مع ربنا فى الدنيا، ومن الحلول اللى بتنفع معايا شخصياً جداً لما أكون فى مشكلة هى إنى أخرج من حولى وقوتى إلى حول وقوة ربنا، إنت لما بتعمل كده انت بتوكل ربنا إنه حرفياً يكون معاك فى كل تفصيلة فى حياتك، ساعتها بتحس ان كل حاجة سهلة وبتنزل من بيتك مش شايل هم أى حاجة لأن لو ربنا معاك مين ممكن يبقى ضدك؟ وإفتكر دايماً إن لما بيكون فى عُسر اليُسر بيكون مُصاحب ليه».
وأكد طارق.. «أن تانى شرط مهم قوى فى إنك تتغلب على مشكلتك هو الأخذ بالاسباب والسعى وانك تعمل اللى عليك. التوكل على الله والسعى هما اللى هيضمنولك خروجك من المشكلة ومن غيرهم هيبقى صعب بنسبة كبيرة انك تتخطى مشاكلك».
