متوقع جداً استخدام روسيا لحق الفيتو لتعطيل اى قرار ضدها تحاول امريكا تمريره من مجلس الامن لان ببساطة شديدة روسيا احدى الدول الخمس الدائمين بمجلس الامن واى دولة منهم تقدر توقف اى قرار بالفيتو وبالتالى مافيش قرار هيطلع بادانة روسيا من مجلس الامن والنتيجة اما انهيار الامم المتحدة زى ما حصل مع عصبة الامم قبل الحرب العالمية الثانية وبداية حرب عالمية تالتة او يرضخ العالم لقواعد اللعبة الروسية وبكده تبقى روسيا كسرت انف امريكا واوربا واصبحت دولة تتحكم بميزان القوة الدولى ومن ثم نتحول لنسق دولى جديد متعدد الاقطاب وتصبح روسيا احد اقطابه ومعاها الصين وينتهى النسق احادى القطبية اللى امريكا القطب الاوحد فيه
خلونا نرجع كده للتاريخ ونشوف ايه اللى حصل . كان ياما كان كانت عصبة الامم منظمة دولية اتأسست بعد الحرب العالميه الاولى كنتيجة لمعاهدة فيرساى المنظمه دى كان هدفها فك اى نزاع او خلاف يحصل بين الدول الاعضاء بالطرق السلميه قبل الموضوع ما يتطور لحرب زى ما حصل فى الحرب العالميه الاولى وبالتالى يتجنب العالم ويلات حرب عالمية نتيجتها خراب دول وموت ملايين من البشر وتشريد ملايين غيرهم وحاولت عصبة الامم انها تخلق جو من الثقه و التفاهم بين الدول الاعضاء لكن المنظمه اللى كان مقرها جنيف بسويسرا فشلت فى مواجهة القوى النازيه بالمانيا و الفاشيه الايطالية اللى كانت طالعه وقتها و فى اشد قوتها و كمان فشلت انها تمنع قيام حرب عالميه جديده .
مين بقى النازيين والفاشيين اللى كانوا سبب دمار العالم بالحرب العالمية الثانية ؟
النازية هى حركة سياسيه ظهرت بعد الحرب العالميه الاولى اسسها هتلر و نشرها في المانيا اللى حولها بعد كده إلى المانيا النازيه بعد ما اخذ الحكم فى سنة 1933. النازيه شكل من اشكال الحكم الديكتاتوري لكن اكثر تطرفاً من الديكتاتورية لان النازيين شايفيين انهم العرق البشرى الوحيد النقى و ان بقيه الاعراق ملوثه او على الاقل اقل درجة من النازيين . النازية ارتكبت جرائم فى حق البشرية بقيادة هتلر اللى كان حلمه يكون امبراطور العالم وبالتالى كان احد الاسباب اللى دفعت للحرب العالمية الثانية لتحقيق حلمه المجنون .
اما الفاشية فحركة سياسية تؤمن ان الاُمم والاعراق فى صراع دايم و القوى بس هو اللى يقدر يعيش ويبقى صحى و حيوى عشان يقدر يواصل صراعه ضد الضعاف .
الفاشية كانت ضد الشيوعية بروسيا والايديولوجية الفاشية بتقوم على نظام حكومة القلة و سيادة سلطة الدوله المطلقة للطبقة الفاشيه الحاكمة و الاعتماد على التنظيمات الشبابية و تمثيل الطبقات مش الاحزاب . اتكون الحزب الفاشيستى فى ايطاليا بزعامة موسولينى .
التحالف ما بين موسولينى وهتلر وطموحاتهم الاستعمارية كانت من الاسباب الاساسية لاندلاع الحرب العالمية الثانية بالاضافة الى العسكرة اليابانية وغزو الصين في ثلاثينيّات القرن العشرين وسياسة هتلر والحزب النازي الخارجية العدوانية. أما السبب المباشر فهو قيام ألمانيا بغزو بولندا 1939م وإعلان بريطانيا وفرنسا الحرب على ألمانيا في 1939م. ونتيجة لكل ما سبق انهارت عصبة الامم لانها فشلت فى تحقيق السلام ومنع عدوان الدول على بعضها .
بعد انتهاء الحرب العالمية الثانية اتاسست الامم المتحدة وكان هدفها الاساسى منع عدوان الدول على بعضها الا بقرار من مجلس الامن للحفاظ على السلم العالمى . والسؤال هنا يا ترى هتقدر الامم المتحدة على حماية المجتمع الدولى من حرب عالمية جديدة؟ ام انهيار الامم المتحدة هيكون مآلها لو فشلت فى الحفاظ على السلام الدولى؟؟
عموما الايام هى اللى هتقول كلمتها الاخيرة ونتمنى من قلبنا ان السلام والخير يكونوا القرار الوحيد الحكيم للمجتمع الدولى.
