زمان كان عندنا مفهوم عظيم اتربينا عليه وهو "بنت الحتة" ومعناه ان البنات محدش يقدر يعاكسها او يضايقها لان رجالة الحتة هتحميها من اى شاب صفيق - على راى فكرى اباظة - يحاول يعمل فيها دنجوان عصره وآوانه للاسف دلوقتى البنت مبقتش تعرف تقف فى البلكونة عشان هتتعرض اما للسان ست حقودة منفسنة منها هتحول وقفتها فى البلكونة الى حكاوى القهاوى بين جيران الحتة او هتلاقى عين عايزة فقعها بتغمز لها وواحد تانى عايز ياخد رقم تليفونها او يحاول يتقرب لها
زمان كان الطالب البليد يمسح السبورة ويشيل للمدرس شنطته عشان يتقرب للمدرس وينجحه اما دلوقتى الطالب البليد بيستخدم كل الاساليب اللا اخلاقية للتوقيع بين زمايله والمدرس زى مثلاً فبركة قصص وحواديت عن زمايله وتوصيلها للمدرس وللاسف فيه نوعية من المدرسين اللى بتسلم ودنها للنوع ده من الطلبة البليدة وتكون النتيجة ظلم الطالب الشاطر بدون مبرر منطقى.
زمان كان الصغير بيحترم الكبير والكبير بيعطف على الصغير دلوقت الصغير بيعتبر ان تطاوله على الكبير حرية واحياناً روشنة والكبير بيتعامل بقسوة وعنف مع الصغير على اعتبار العنف ده هيبة ورهبة
مفاهيم غلط سادت وموازين اخلاق مالت والحال مش هو الحال اكيد محتاجين وقفة مع الذات والمجتمع عشان نرجع لاخلاق وذوق وادب زمان
