عندى اعتراف صغير كده عن نفسى.. فأنا ولله الحمد أكثر شخص عصبى فى الدنيا.. اكيد وانت بتقرا هتحب تعلى عليا وتقولى بس يابن امبارح انتو شوفتوا عصبية انتوا ولا تعرفوا يعنى ايه عصبية.. ماش..
خليك معايا بس لآخر الخط وانت تعرف عصبيتى نوع عامل ازاى
ان اللى اعرفه عن خلق الله انهم يتعصبوا عشان حاجة كبيرة تنرفز كده وتشيط العقل.. لكن أنا بقى عصبيتى من نوع مختلف زى ما بيقولوا كده بأجى فى الهايفة واتصدر.. انا بقى المختل ده
وبكتب المقال ده عشان ادافع عن نفسى وعن كل امثالى المختلين او كما تصفوننا.. انما أحنا والله دماغنا متكلفة وعالم رزينة بس انتو اللى مش فهمنا
تعالوا معايا كده وفكولى ترابيس مخكوا شوية واضربوا واحد ليمون نعناع فريش وفوقولى.. فوقوووولى هاااه
تعرفوا يعنى بديهيات.. عارفها يابنى عارفها ياحاج عارفها يامدام.. سهلة مش محتاجة شرح طبعا «بديهيات «، تعلالى انت بقى ياللى واقف متنح وفاتحلى بوقك وبتلعب فى شعرك ولا فاهم حاجة على عينك، الواد المبلم ده .. هو ده بقى ازمتى فى الحياة
واللى فقعلى مرراتى وكليتى وكل الحاجات المجعلصة اللى فى كرشى دى.. بديهيات يابنى بديهات مش عارفها ينهار اسود عليا وعلى سنينى السودة
كلمة بديهيات نفسها مش عارفها فتخيلوا هيبقى حاله ايه مع البديهيات نفسها بقى.. تخيلتوا ..
خليك معايا عشان تعرف ازمتى وانى مش مجنون
الباشا ده بقى بسم الله ما شاء الله دايما ربنا رزقه بصفتين ماينفعوش يركبوا مع بعض.. حاجة عاملة زى مركبات الكيمياء كده لو اتحطوا فى محلول واحد الدنيا تولع.. ولكن سبحان الله سبحان الله والله .. له فى خلقه حكم ويخلق ما لا تعلمون..
فى بنى ادم قادر يجمع بين التبلد، لا تبلد ايه خلينا نديله حقه قول «تناحة رخامة رزالة « حاجة كده عايش دور عنتر زمانه فاهم فى كل حاجة «نابغة» اسم النبى حارسه وصاينه حبيب أمه، وصفته التانية ان معلوماته فى اى حاجة عاملة زى معلومات الانسان البدائى عن الكمبيوتر مثلا.
فتلاقيه دايما بيناطح فى اى حاجة.. لايوجد اى منطق عنده ممكن ١+١ تساوى ٩٩ عنده هتقولى متسالش ازاى طبعا مع الناس دى لكن ياريت تيجى على قد كده وبس لا لا لا .. عذرا ياسيدى الحكم على رأى حفيظ دراجى المعلق الكروى.. الالعن انه هتلاقيه بيقولك ويسردلك ويشرحلك بالعلم والمنطق ازاى فعلا ان ١+١= ٩٩
وهيناقض كل قوانين الرياضة والطبيعة وهيسب ويلعن فى فيساغورث مؤسس علم الرياضيات ويقولك هو ده بيفهم حاجة.. مش قولتلك ويخلق ما لا تعلمون اه والله.
ولو على المواقف فهى كتير اوووى الصراحة هتلاقيه بيفتى فى الكرة والطب والسياسة وعلوم الذرة حتى .. لو سئلت حد عصبى .. ايه اكتر حاجة تعصبك هيرد يقولك الاستفزاز من غير تفكير .. والاستفزاز انواع واكثرهم شراسة هو صاحبنا ده اللى عامل فيها ابو العريف وبيناطح فى بديهيات.
فعزيزى القارئ لو قبلت حد من الأشخاص دى ابعد عنه فورا اياك تناقشه عشان هيعصبك وادعيله ان ربنا يهديه او ياخده بقى ويريحنا منه .. اما عزيزى القارئ لو حسيت ان الكلام ده بيلمسك فأبوس ايديك ورجلك تحاول تتغير عشان احنا ماشيين بالعلاج والله .
المهم بس قبل ما أخلص كلامى .. كان عندى سؤال شاغل بالى بقاله كام يوم ونفسى اوجدله اجابة .. فكروا معايا كده ايهما أقوى بطولة أفريقيا ولا الدورى المحلى!
