أستاذ معتز عبد الفتاح حضرتك كنت متحمس أثناء استعراض أجندة الأمريكان في تطبيق الديمقراطية وبتتكلم عن مدى رغبتهم في تطبيقها في بعض الدول وانهم هيتكلموا معانا ويسألونا.
سؤال يا أستاذ معتز.. إيه رأيك في تجربة الأمريكان في تطبيق الديمقراطية في العراق ؟
طيب هل قرأت مذكرات هيلاري اللي بتدعم نشر الفوضى ؟
ولا دي كمان هنغض بصرنا عن كل تجاوزاتها ونعتبرها ديمقراطية برضو ؟
حضرتك قولت فيما معناه ، إنهم لما يجو يسألونا عن الديمقراطية هنقول إننا مهدنا الطريق لتطبيق الديمقراطية سواء باستقرار الدولة أو خروج الجماعات الدينية من المشهد مع إن حضرتك عارف إن الأمريكان الديمقراطيين بذات نفسهم هما اللي دعموا التيار الإرهابي دعم مباشر وقوي للوصول للسلطة وهددوا استقرار الدولة ؟
أزاي بعد ما قدموا لهم كل الدعم ، هيعتبروا خروجهم من المشهد خطوة ايجابية في طريق الديمقراطية؟
اتكلمت، عن ضرورة وجود حزبين كبار ، واحد مؤيد والتاني وطني معارض لإثراء الحياة السياسية ،، أنا معاك جدااا
بس يا استاذ معتز إحنا عندنا اكتر من 100 حزب سياسي ، حد قالهم خليكم تافهين وغير مؤثرين في الحياة السياسية ؟
أنت بنفسك قولت إن ثقافة النخب شكلت عائق .
طيب اذا كانت المعارضة نفسها لا تقبل النقد او المعارضة ،، حتى على مواقع التواصل بيعملوا بلوك لاي حد ينتقدهم ،، وعايشين في دور الضحية،، نعملهم ايه احنا بقى ؟
هل نخلي النظام يجتمع بيهم ويتحايل عليهم ويقولهم أرجوكم أعقلوا كده وخليكم ناضجين ووحدوا صفوفكم واطلعوا عارضوني ؟
الدولة لم تمانع أبدا في تشكيل أحزاب إلا لو كانت قائمة على أساس ديني ،سؤال بجد نعمل إيه تاني ؟
حضرتك قولت كمان انه ضروري يكون فيه مجتمع مدني فاعل في مصر،، اللي اعرفه إن دور ونشاط المجتمع المدني بيكون غير ربحي ، وبيشتغل على خدمة الشعب ،سواء في الجانب الخيري أو المهني، أو الإنساني أو الثقافي، زي المنظمات والنقابات والجمعيات إحنا عندنا نقابات وجمعيات خيرية ومراكز ومنظمات لدعم حقوق المرأة ومنظمات الطفل، ومراكز أنشطة ثقافية ،ودعم تنمية المهارات ولو على الأنشطة السياسية فعندنا أكثر من 100 حزب سياسي حتى حقوق الحيوانات عندنا اكتر من 7 منظمات.. ناقص حاجة تانية ؟؟ عشان نبقى حلوين ونعجب نظام بايدن الديمقراطي اللي فاز بأصوات الأموات.
واللي حضرتك بتطالبنا إننا نبدأ من نفسنا ونشتغل على الحاجات دي، قبل ما يجي الكهل المسن بايدن ويطالبنا بيها؟
