سألت ازاي؟! ومين انتي؟!
وايه جواكي جراني؟!
لاقيتك فاضية من جوه
لاقيتك سـُكنه براني
أساسها الهشّ غرقني
وخسرني وبكاني
فقلت لنفسي ليه تسكت؟!
تعيد الغلطة ليه تاني؟!
ما دام حبيت سنين واديت وما نفعشِ
في ناس بتعيش عشان تاخد ما تشبعشِ
حياتهم باهتة .. تعبانة
وقلبي كان برئ عشمان ..
ضريح بتغلفُه التسابيح
وقربي كان مسبب داء
لناس مسمومة طمعانه
طبيعي نهون
طبيعي نكون ضحية شوق
بنطلب ليه من الجاني يناول طوق
تعالى نفوق
طربقنا طويل
يا ريت نفهم حاجات متعادة 100 مرة
ونفهم حكمة التأويل
عشان "الفهم بيريَّح"
أنا محتاج لراحة بال
أنا محتاج انام الليل
بفكر ليه؟!
وليه بنزود المأساه
وليه بنشيل؟
دوايا في إيدي وانا عارفه
هسيب الحب على ربي
واسيب الحق للتساهيل
عذابي دليل على خيبتي
عذابها دليل على المردود
أذيتني محيتها من وقتي
أذيتها ولسه مش مبسوط
أكيد هاعمل حاجات تنفع
تصون الباقي من هيبتي
ونشبع فيها لطم وشوط
ونشبع فيها لطم وشوط
