سماكي يا دنيا سِجَّاده
وخاليه من النقـُوش "ساده"
حَدَفتلها النظَر أشكال
خَبَط وِنْزلِّي كالعاده
لا ساب فيها الدُّعا والـ آه
ولا هيـَّـئْـهَـا لِـعـْـبَـاده
سماكي يا دنيا سِجَّاده
ما بتبحَّرش وتمطًّر
وتغرف م الهنا وتدِّي
ما بتعشِّمش وتصبَّر
تملِّي عَـ الدماغ تِدِّي
ياخيط الشمس انا وِدِّي
تسيب الدنيا مِنقاده
سماكي يا دنيا سِجَّاده
بتاكل من شراشيبها
بتاكل م الشجر أغصان
تغرَّق ف الرمال شارب
تغرَّق ف البحور عطشان
تملِّي بتكره الغلبان
تحب العِيلَه والـ "سَّاده"
سماكي يا دنيا سِجَّاده
