تايه أنا
والسكة ليل ملهوش نهاية
والضلمة تحضن سكتي
من غير أمل
يجدل ضفاير نورها ف غربتي
والغربة تنهش في الحشا
والنور سراب
ملهوش حدود
متسرسبة من إيدي ليه
كل الأماني
متجمعة في بير غويط
والدنيا دايما مش بتضحك
غير ع العبيط
وأنا في هواك لا عمري كنت ولا هاكون
فارس بيطحن في السنين
يا ليل بيحضن في الحواشي
يملا القلوب عتمة وظلام
خلص الكلام
ما أنا أصلي معرفتش في يوم
ألضم حروف المعنى وسط الابتسام
متسرسبة
من إيدي كل الأمنيات
والذكريات
نارها بتكوي في الضلوع
مليش صديق غير الدموع
وأنا والعيون
ملناش في دنيا العشق غير الفروع
أصل الأصول
مش لينا فيها غير الرجوع
ملعونة يا دنيا الخيال
ليه بتعشميني بالمحال
وفي ليل غميق
بتضحّكي عليا العيال
دا أنا عمري يوم ما زعلت منك
ليه تكسري فيا الربيع
ليه تنقليني من نسيمك للهيب
دا أنا كنت بأعشق فيكي أحلام الصبايا
ياما جبتلك من السما نجمة تنور ليل عيوني
ليه تخدعيني
ليه بتشليني للسما
ليه بتسبيني
دا انا كنت فارد ع الضفاير يوم جناح
ولا كنت خايف من إيديكي ف يوم جراح
متسرسبة
أحلامي مني بتنتهي
راح أشيل حمولي من بداية الطريق
هاستنى تاني ترجعي
بس إنت رحتي للنهاية
سبتي الأمل والجرح ليه دايما معايا
يا فرحة كانت في الحواشي والضلوع
أنا بأضيع
من غير عيونك اللي فيها النور طفا
قلبي اختفى
ما قدرت يوم أرسم على جلدي الدفا
غدار يا بحر نزلته يوم من غير شراع
ما أنا كنت فاكر فيك صفات من الوفا
شدتني ليه ولا سبت قلبي عليك طفا
متسرسبة
ياليالي ملهاش من الحبايب يوم نصيب
كل اللي ليها سهم في القلوب يصيب
ويمر عليا كل يوم بيوم عصيب
يا دنيا بكفاية كده
دا أنا اللي قلبي ما كان في يوم يعرف يخون
ليه قلبي صار على الحبايب كل يوم مدبوح يهون
بكفاية كده
ولا خلاص مبقاش لنا في حبك نصيب
ليه عايزة تطفي النور في قلبي وتحرميني بسمتك
أنا قلبي عصفور لسة طاير في السما
والدمعة لسة في العيون متبسمة
وأنا ف أول الطريق مستني نورك
والنجمة في إيديا طفاها الانتظار
والعتمة للنور احتضار
سكة مرار
متسرسبة
