حوار : نغم وليد ، أروى حمدي
تألق الفنان الشاب "معتز هشام" في مسلسله الأخير "ليه لأ" الجزء الثالث ، الذي يعرض حالياً علي منصة watch it ، و نال جدلا واسعا من ردود أفعال الجمهور عن شخصية "ياسين" الذي قدمها .
في حوار خاص مع الفنان معتز هشام لـ"بوابة أخبار اليوم" تحدث عن كواليس مسلسل "ليه لأ 3" ، و أعماله الفنية الأخري ، و ما يتم تحضيره الفترة المقبلة .
في البداية.. ماذا عن كواليس مسلسل ليه لأ 3 ؟
الكواليس بينا كانت لذيذة جداً ، سواء الإخراج أو الإنتاج أو الممثلين ، كل الناس كانت حابه العمل بشكل كبير و بيشتغلوا عليه بحب.
ماذا عن تعاونك مع المؤلفة مريم نعوم مؤلفة ليه لأ 3 ؟
كنت مبسوط في العمل معاها ، و بحب أعمالها جداً واتقابلنا مرتين في التصوير و دي كانت تاني مرة نشتغل فيها حاجة مع بعض.
كيف حضرت لشخصية "ياسين" الذي تقوم بها في مسلسل ليه لأ 3 ؟
في شخص أعرفه شبه شخصية ياسين شوية ، وقريت الدور واتكلمت مع أستاذة نادين خان في طريقة تفكير ياسين ، و هي شيفاها إزاي و أنا شايفها إزاي .
هل يوجد صفات مشتركة بين شخصيتك في الحقيقة و شخصية "ياسين"؟
لأ ، مفيش بيني وبين ياسين أي صفات مشتركة.
ماذا عن تعاونك مع النجمة نيللي كريم ؟
نيللي كريم عندها نفس تعامل الأم ده بره التصوير جداً ، و في مشهد العربية قعدنا حوالي ساعة كانت بتنصحني فيهم في أمور الدنيا عامة .
ما رأيك في التعليقات السلبية التي واجهتها بسبب شخصية ياسين ؟ وكيف تعاملت معها؟
موضوع التعليقات السلبية ده بيبسطني جداً ، لأنه نجاح بالنسبالي كمعتز ، لكن كياسين أكيد هيضايق .
وكنت بتعامل مع التعليقات السلبية كمعتز بحاول أطور من نفسي في الجزء اللي شايفة المشاهد مش حلو.
هل مسلسل "ليه لأ 3" خطوة مؤثرة في حياتك؟
طبعاً خطوة مؤثرة و مهمة و كبيرة جداً بالنسبالي و دور ياسين نفسه كان مهم جداً.
هل تحب تكرار تجربة المسلسلات التاريخية مرة أخرى بعد مشاركتك في مسلسل "ممالك النار" ؟
ممالك النار من أمتع التجارب اللي عملتها ، و ردود أفعال الناس علي المسلسل و علي الشخصية اللي قدمتها كانت حلوة جداً ، و اللغة العربية بالنسبالي دلوقتي متقنها بشكل كويس ،و أحب أشارك في أعمال تاريخية مرة تانية.
أغلب الشخصيات التي تقوم بتجسدها في الأغلب شخصيات صعبة .. هل لديك معايير في إختيار الأدوار ؟
علي حسب الأدوار اللي بتتعرض ، بحاول أشوف الأدوار اللي هتفدني كمعتز ، و علي حسب القضية اللي بيتكلم عنها الدور و بيناقشها المسلسل.
هل ممكن تكرر نفس الدور أو الشخصية في أكثر من عمل؟
لا مش بحب أن الأدوار تكون متكررة ، بس لو متكررة بشكل مختلف و طريقة أحداث مختلفة وسرد مختلف للشخصية تمام .
ما العمل الذي من بعده بدأ الجمهور يتعرف عليك في الشارع؟
الحمد لله من أول حاجة عملتها "أبو عمر المصري" والناس بدأت تعرفني بشكل كويس ، "ممالك النار" لما جه بعده كان علي نطاق أكبر وكان شامل الوطن العربي.
هل بتضايق من وجود تساؤلات إنك مش مصري ؟
لا عادي دي حاجة مش بتضايقني ، كمان في ناس بتشبهني بعمر الشريف.
بتشوف نفسك شبه مين أكثر "عمر الشريف" ، "رامي مالك"؟
بحس نفسي شبه الأتنين ، بحس نفسي زمان كنت شبه عمر الشريف ، و شبه رامي مالك دلوقتي.
هل بتحضر حاجة جديدة الفترة المقبلة ؟
إن شاء الله فيلم "سكر" هيتعرض قريب جداً ، إحنا خلصنا تصوير من فترة.
ماذا عن تعاونك مع النجمة القديرة ماجدة ذكي في فيلم "سكر"؟
أستاذة ماجدة ذكي نجمة كبيرة جداً و أتبسطت بالشغل معاها ، وكانت بمثابة أم لينا، علي مدار تسع شهور التصوير أصبحنا أسرة .
ما هي قصة فيلم "سكر"؟
قصة الفيلم عن دار أيتام ، وأنا بعمل دور طارق و هو ولد ضمن أولاد الدار ، وبيحب لعب الكورة و نفسه يبقي لاعب كورة مشهور ، و الأولاد الموجودين بالدار بيعملوا مهمات طول الفيلم ، وحاجات فيها شغب و ساعات بيحلوا مشاكل لناس و أحياناً بيقوموا بأعمال خير .
أستاذة ماجدة ذكي عاملة دور "رتيبة" ، وهي صاحبة دار الأيتام و شخصيتها في الفيلم شديدة علي الأولاد في الدار.
أخر مسلسل شوفته و عجبك ؟
أخر مسلسل اتفرجت عليه كان "جعفر العمدة" و عجبني جداً ومشوفتش حاجة تانية بعده.
مسلسل بتحبه وكان نفسك تشارك فيه ؟
مسلسل la casa de papel.
ممثل نفسك تمثل معاه؟
ناس كتير أوي نفسي أمثل معاها منهم كريم عبد العزيز ، أحمد السقا ، أمير كرارة ، محمد إمام ، محمد رمضان .
بتحب تسمع لمين أغاني ؟
لو طرب أكيد بحب أم كلثوم ، و لو راب بحب ويجز و زياد ظاظا.
