حلت الفنانة منة شلبي ضيفة على برنامج سهرانين الذي يقدمه الفنان أمير كرارة المُذاع عبر قناة ON E.
وصرحت الفنانة منة شلبي عن صداقتها بالفنانة هند صبري حيث قالت: "أنا وهند صبري مكانش لينا في بعض أوي، طلعت أنا وهي طلعنا مع بعض في بدايتنا، كانت هي بتعمل مواطن ومخبر وحرامي ومذكرات مراهقة، وفي نفس السنين دي أنا كنت بعمل الساحر وبحب السيما، واحنا كنا متنافسين تمامًا، فيجي حد يقولي دي مش بتحبك".
وأضافت: "في فيلم أحلى الأوقات كان فيه بينا ود وصداقة شديدة، وأنا وهند مكناش قريبين من بعض، بس من كتر ما احنا بنحب حنان ترك جدً، تلقائي بقينا قريبين، وخلص الفيلم لا حرب ولا سلم".
واختتمت قائلة: "وبعد كدا جالنا بنات وسط البلد، واحنا الاتنين مكانش في بينا خناقة، ومكنش في بينا حب، فأستاذ محمد خان قالي هند هتعمل دور جومانا فقولتله مفيش مشكلة، فقالي انتو هتيجوا عندي البيت نعمل بروفة، وهناك قولتلها أنا في كلام عايزة اقولهولك، قالتلي وأنا كمان، وقعدنا نتكلم مع بعض، واتصافينا".
