أمَّا تيجو تفارقو فارقو
بس سيبو الباب موارب
سيبو بسمه
سيبو ضحكه
سيبو لفته في الوداع
زي كلمة كان وباع
بس غالي
لسه عندي مقامو عالي
واللي بينَّا دا عيش وملح
إنتهت بدموع صحيح
بس كان جواها فَرْح
أمَّا تيجو تسيبو حد
خللو حد العِشره غالب
وإقفلو باب العناد
ع اللي مغلوب واللي غالب
مهما نور الشمس غارب
جي ضي الصبح
يمكن، فوق جبينو شروق وصُلح
أو بواقي ذكرى صافيه
كلمه دافيه وقت قُرب
نفتكرها نقول: يا رب
داوي قلب الطيبين
واشفي جرح المجروحين
مهزومين مهما انتصرنا
بالأماني والحنين
أمَّا تيجو بجد تمشو
خلو أحزانكم نبيله
الحياه بتلف بينا
والمُدان يصبح مُدين
أمَّا تيجو تفارقو فارقو
بس كونوا حنينين
