كنوز | تعدد الزوجات على ارغول «بيرم»

الأوله آه .. والتانيه آه .. والتالته آه 
الأوله آه، دهتنى ليلة الدخله. 
والتانية آه، وقعتنى الخاطبه فى وحله. 
والتالتة آه، لما خشت شفتها أحلى. 
الأوله آه، دهتنى ليلة الدخلة، لها منقار. 
والتانية آه، وقعتنى الخاطبة فى وحلة، بتاعة زار. 
والتالتة آه، لما خشت شفتها أحلى، وشبه صغار. 
الأوله آه، دهتنى ليلة الدخلة، لها منقار - وخنشورة. 
والتانية آه، وقعتنى الخاطبة فى وحله، بتاعت زار - وزعرورة. 
والتالتة آه، لما خشت شفتها أحلى، وشبه صغار - لكن عورة. 
الأوله لما وفت شهرها الكامل - جابت بنتين. 
والتانية فى المحكمة قالت أنا حامل - لها سنين. 
التالتة لجل النصيب والحظ تتجامل - مجاملة عين. 
تلات نعيج والخروف - عايز يربعهم. 
لو كانوا قاعدين ضيوف - ما كان يشبعهم. 
ياللى قنيت التلات نسوان رجعهم. 
الأوله آه .. والتانية آه .. والتالتة آه. 

بيرم التونسى  مجلة «الشباب» - 19 فبراير 1922

إقرأ أيضاً|نهاد أبو القمصان توضح حقيقة تصريحها «الست مش ملزمة بالرضاعة»| فيديو