نسيت أعمل بلوك كالعادة لمندوب شركة التسويق العقارى الذى طاردنى ليبيع لى شقة فى الساحل الشمالى بتسعة ملايين جنيه ففوجئت به يعيد الكرة من جديد فقررت أن أرد عليه مستخدما نظرية الهجوم خير وسيلة للدفاع:
- جود مورنينج يا مستر هشام معلش سورى الأسبوع اللى فات معرفتش اكلم حضرتك مرة تانية.
- ولا يهمك يارب المرة دى يكون عندكم حاجة تستاهل!
- يا فندم احنا دايما عندنا جديد
- جديد ايه يابنى وانت أساسا بتكلمنى من بابلك نمبر، مش عارف ازاى شركة كبيرة زى كده ومش جايبة لفريق التسويق برايفت نمبرز، على كل حال انت محظوظ جدا لأنى مش برد على أى بابلك نمبر، أكيد امك داعيالك.
- أفندم حضرتك بتقول مين داعيالى؟
- قصدى يور ماذر يا بنى يور ماذر ، معلش الواحد بقى ساعات ينسى ويتكلم وكأنه من أبناء المناطق الشعبية
- عندك حق يا فندم ولا يهمك، عموما المكالمة مع حضرتك متسجلة وأكيد لما الإدارة العليا تسمعها هتراعى النقطة دى وتجيبلنا برايفت نمبرز.
- طب كويس جدا لان عندى كلام كتير للإدارة العليا، ازاى يا إدارة يا عليا بتعرضى عليا شقة فى كومباوند وممكن لا مؤاخذة يعنى يكون معايا سباكين مثلا أو أى صنايعية لأن مع احترامى لكل الناس فيه حاجة اسمها التوافق الاجتماعى و الحكاية مش حكاية فلوس وبس وأظن مش معقول تكون عايزنى اسكن فى الساحل الطيب؟
- حضرتك عارف بقى الشركات المنافسة وحرب الشائعات وعايز اؤكد لحضرتك اننا فى الساحل الشرير.
- طب افتكر انك قولتلى ان الشقة بتسعة مليون؟!
- مظبوط يا فندم وبالتقسيط المريح سعادتك؟
- وكمان بتكررها فى وشي؟ تسعة مليون ايه وكلام فارغ ايه يا افندى اللى بتعرضه عليا ده، ، فين الفيلل ام 105 مليون جنيه ولا دى شايلنها على جنب للحبايب والمجاملات
- بنعتذر لحضرتك ان الفيلل ام 105 مليون خلصت فى غمضة عين لكن بنوعدك لو اخدت معانا الشقة المحندقة دى ام 9 مليون ممكن يبقالك أولوية فى دفعة الفلل الجديدة اللى هتنزل فى السيزون الجديد بـ 200 مليون جنيه.
- لالالا بصراحة اللى سمعته عن القرية بتاعتكم ميشجعش ، معقولة يا راجل معندكمش تليفريك !
- بسيطة يا فندم بسيطة اكيد الإدارة العليا اللى سمعانا دلوقتى هتاخد كلام حضرتك فى الاعتبار وتدخل التلفريك فى الخطة ها أبعت لحضرتك المندوب بالعقد ونقول مبروك؟
- عندكم فى القرية بتاعتكم رياضة ركوب الأمواج؟!
- تقصد ركوب الهوا يافندم؟
- لالالا دى مش محتاجة ساحل ولا بحر، الحكومة كتر خيرها مركبانا الهوا ليل نهار، انا بتكلم على ركوب الأمواج.
- اكيد يا فندم الإدارة العليا هتراعى طلب حضرتك بس ياريت نتعاقد قبل ما الشقق تخلص وحضرتك تزعل.
- مش هتعاقد الا لما تدخلوا رياضة ركوب الأمواج
- يافندم الصيف قرب يخلص وحضرتك لسه ما شرفتناش
- أنا أقضيها هنا فى الحر ده اشر عرق ليل نهار ولا انى اروح ساحل شمالى وادفع ملايين ومقدرش أمارس فيه هوايتى المفضلة والله على كده مستر سعد زغلول كان عنده حق!
- لو مستر سعد ده يهمك وواخد فكرة غلط عننا ياريت تدينى رقمه علشان اعرض عليه يمكن اقنعه يغير رأيه!
- وفر كلامك، انا عرضت عليه نيابة عنك!
- وقالك ايه يافندم؟
- قالى مفيش فايدة.. ملناش فى الساحل نصيب!
