أول مرة تأتي فيها إلى مصر بلدها منذ سفرها وانطلاقها عالميا في باريس بعد أن تبناها وأحبها المنتج والموزع EDDIE BARCLAY وغير اسمها من يولاندا إلى داليدا وقدمها في عدة أغنيات فرنسية وإيطالية جعلتها تمثل مكانة دائمة في قائمة العشرة على القمة في دنيا الموسيقى والغناء في أوروبا وأمريكا.
وقد سبق وصولها القاهرة حملة دعائية كبيرة في كل الصحف لإحياء حفلتين في مصر، حيث كان حلمها زيارة بيتها في شبرا، بحسب ما نشرته جريدة أخبار اليوم.
أما الفنان سمير صبري فقد تحدث حينها عن تلك الزيارة فقال: "تحدد لي موعد لقاء لبرنامجي النادي الدولي وذلك في فندق هيلتون حيث تقيم مع شقيقها برونو الذي سبق أن حاول الانتشار كمغن في باريس بعد أن غنى «يا مصطفى يا مصطفى» أول ألحان محمد فوزي".
سمير صبري أضاف: "كانت داليدا في انتظاري في جناحها ترتدي ملابس بسيطة ومكياج قليل جدا وتبتسم وتقول: حانتكلم عربي أنا لسه فاكره ومش ممكن أنسى لغتي وبلدي".
وقالت داليدا: "اشتغلت كومبارس في أفلام كثيرة.. أنا كنت على الحصان ورا ليلى مراد في أغنية اتمخطرى يا خيل في فيلم غزل البنات وكانت جنبي هند رستم كمان وصورنا الأغنية دي كلها في حديقة النزهة في الإسكندرية وأخذت خمسة جنيه.. كنت فرحانة قوي إني مع ليلى مراد باموت فيها دي نجمة ستار كبيرة قوي".
وسألها سمير صبري: لسه بيتك في شبرا موجود؟
قالت : لأنني زمان سيبناه .. خسارة كان نفسي أشوف البيت تاني وأسمع الخناقات اللي كنت باسمعها وأشوفها كل يوم علشان إحنا في أول دور وكل يوم لازم فيه « شمطه» تحت البيت".
ومضت في حديثها: عملت مشهد واحد مع العظيمة فاتن حمامة في المنزل رقم 13 واشتغلت مع سامية جمال في فيلم سيجارة وكأس.. والفيلم دا غنيت فيه أغنية إيطالية وهي الأغنية نفسها اللي بعتها مع واحد خواجة متعهد حفلات يعرف مسيو باركلاي في باريس.. سمع الأغنية وقال هاتولي البنت دي وفعلا سافرت باريس ومسيو باركلاي غير شكلي وشعري وعلمني أتكلم إزاي وأقعد إزاي وامتى نتكلم ومتى أسكت.
واختتم سمير صبري حديثه: "داليدا طلبت مني طلبا حيث قالت سمير من فضلك بعد الحفلة عايزة خدمة منك ممكن ؟ وقالت وديني شبرا عاوزه أشوفها امشي في الشارع بتاعنا أسمع خناقة واحدة بس".
المصدر: مركز معلومات أخبار اليوم
اقرأ أيضا| بعد انفصاله الأول عن البارودي.. حسن يوسف يرجو عودة لبلبة
