نيرة كامل
عمرك فكرت تهرب؟ مش لازم سبب تهرب منه، ممكن يكون زهق، توهان، مشاكل عائلية، أمر واقع مش قادر تتحمله محاط بأسباب كتير وقررت فجأة تتخلى عن كل ده وتهرب وتسيب البيت!!
ها فكرت فى الخطة وجهزتها ولا لسه؟ لو لسه خلينى أقولك خطوات أخواتك السابقين وأجدادك، والمهتمين بأمور الهروب والذى منه.. بص يا سيدى اكتب ورايا:
وأول حاجة تعملها.. هتدخل على الفيس بوك والإنستجرام وكمان التيك توك، وتشوف كام أكونت من اللى عليهم علامة زرقا وعندهم ملايين من الفلورز وآلاف من الكومنتات وتجمع داتا ليهم، أقولك إفتح إكسل شيت وجمع اللى هقولك عليه......
رايح فين؟!.. أنت فاكرها سهلة، استنى امشى معايا خطوة بخطوة، عشان منتوهش فى بلاد الفرنجة سوا، أصل الهروب من البيت حواراته كتيرة..
عندك أكونتات «بلوجرز السفر والزقططة» هيرشحولك أماكن كتير وأوتيلات أكترس غالية أووى، وفى رخيص كمان بس محتاج واحد شجاع عشان يعرف يظبط أموره وميضحكش عليه فى بلد اللى عليها العين، وبعدين ندخل على أكونتات «بلوجرز الأكل» اللى هيرشحولك أكلات بالمئات فى نفس البلد المختارة، ومش بعيد تتعلملك أكلتين تلاتة ينفعوك وقت الكحرته لو اتسرقت فلوسك فى الأماكن الرخيصة اللى اتكلمنا عليها فوق....
إوعى تنسى أكونتات «بلوجرز اللبس والفاشون» عشان تعرف هتتشيك إزاى هناك بـ 20 يورو أو دولار بس وياسلام بقى لو فى مناسبة زى الفلانتين وقررت تجيب لحبيبتك هدية فدول أنسب ناس هيقولك تجيب ورد وشكولاته منين، ومتقلقش هتلاقى كمان» بلوجرز للتنمية البشرية» مش هيسبوك فى حالك وهتلاقيهم فى كل مكان، وهيعلموك يبقى عندك إحساس يساع الكون بحاله، بس مش هيساعك انت يا بائس يافقير لا كمان مسروق.
وانت بتجمع معلوماتك كده هتلاقى أخواتنا اللى بيحكوا ويحرقولنا الأفلام والمسلسلات متتفرجش عليهم، واشتريلك فلاشة وحمل عليها الحاج عبدالغفور وحرمه فاطمة.. هينفعوك فى الغربة.
فاكر نفسك خلصت.. لا أنت لسه هتقرأ مقالات كتير تانى، عن ناس سافرت بـ 200 جنيه بس وعاشت عيشة الرفاهية فى بلدك وبرا بلدك والله.. ها خلصت وحفظت الإكسل شيت وبوستات البلوجرز ولا لسه؟.. هنيجى بقى للحظة المهمة..
ادخل افتح محفظتك وشوف فيها كام وكلم البنك إعرف حسابك عندهم وصل لكام ؟
مالك اتخضيت كده ليه محفظتك إتسرقت؟.. نعم!! معاك 15جنيه بس، ومديون للبنك كمان
لا أنت تنسى حوار الهروب ده، شكله مش كارك... وتقفل النت وتدخل أوضتك وتشد اللحاف وتنام أنت ومحفظتك كده كده الجو برد والنت قاطع عندك وأنت سنجل.
إقرأ أيضاً|هل تراجعت عن الاعتذار ؟.. أصالة تفاجئ أنغام برد فعل صادم
