أحمد مصطفى شعبان
لو فكرت تسافر أوروبا دلوقتى هتلاقى الشوارع وأبرز المعالم تتزين بأضواء وديكورات الكريسماس واستقبال السنة الجديدة، بس غالبا مش هتلاقى زحمة إلا فى أماكن قليلة جدا بسبب كورونا.
ومن الدول اللى بتفرض قيود صارمة هى ألمانيا لدرجة أنه فى ولايات قررت إغلاق أسواق عيد الميلاد. بس رغم كل الهلع فى حاجة غريبة حصلت الأسبوع ده فى العاصمة برلين. ايه اللى حصل؟.
هيئة النقل فى برلين طرحت للركاب تذاكر صالحة للأكل بطعم «الحشيش»!.. ايه بتقول ايه؟..لازم متصدقش.. بس خلينى أقولك إنه أى حد هيركب الحافلات أو الترام أو المترو فى برلين هيقدر ياخد تذكرة الحشيش دى ومش هيحس بأى زحمة ده مش هيحس بأى حاجة خالص.
يا خبر!.. لا لسه.. ايه تانى؟.. الهيئة دى طلعت بيان قالت فيه إن أى حد عايز يشعر بالاسترخاء خلال الكريسماس احنا عندنا الوصفة السحرية وهى «عبارة عن حشيشة حقيقية».
الشركة بررت طرحها تذكرة المزاج دى عشان تكافح التوتر اللى عند الركاب بسبب كورونا اللى فرض عليهم عادات غير مألوفة فى فترة الكريسماس. « عليا النعمة أنت مزاجك عالى اوى النهاردة».
التذكرة دى صالحة لمدة ٢٤ ساعة وسعرها حوالى ٩ يورو ويمكن أكلها بعد انتهاء صلاحيتها. «ده خمس نجوم ده والله».
الظريف كمان تعليقات الناس على الفكرة لدرجة أنه حد كتب على مواقع التواصل الاجتماعى «من الآن فصاعداً، يمكننا أيضاً أن نطير».. لا من الناحية دى اطمن.
ياااه دى عالم فاضية مش لاقية حاجة تعملها.. لسه. لا متقولش إنه فى كلام تانى يتقال عن القصة العجيبة دي؟.. هأحرجك وأقولك أيوة.. هيئة النقل فى برلين أكدت أنها «ضد أى شكل من أشكال تعاطى المخدرات». لا يا راجل؟!.. لا عداها العيب.. كتر خيرها.
إقرأ أيضاً|فرفش كده ..بتحط نفسك فى مواقف بااايخة
