علق طارق الشناوي الناقد الفني، على أغنية "شيماء" التي غزت مواقع السوشيال ميديا، قائلًا: "دا العادي ولا نحاكم المؤدي للأغنية طالما لا يوجد خروج عن الآداب أو أي كلمات قبيحة خلاص، ممكن نكته شخص يضحك والتاني لا، فيجب ألا نتوقف أمام نكته ونعمل معركة، وتبقى دي النكته بقى".
وأضاف "الشناوي" في مداخلة هاتفية لبرنامج "رأي عام" مع الإعلامي عمرو عبدالحميد، على فضائية "TeN" اليوم الاثنين: "اللي سمعته في أغنية شيماء دمه خفيف وقد يراه البعض غير ذلك مش مشكلة، بس شايف أن الأبواب دي تفتح ومحدش يعرقل أو يحاكم أشياء بأنها تافهة، لأن التفاهة درجات".
وتابع: "الحاجات التافهة اللي مبتأذيش تعدي ومش لازم نفكر في الحاجة مليون مرة، وطالما الحاجة بسيطة بطبعها ومفيهاش سب أو قذف أو خروج عن الأداب، فنيًا ممكن متعجبش ناس بس هل الناس اللي مش عاجباهم يصادروا الحاجات اللي شايفينها من وجهة نظرهم سيئة، ولكننا نصادر في حالة الخروج عن الآداب".
