عبد الصبور بدر
مالك مشغول، ماترسينى على الدور..
قالها عباس بعد أن سحب نفسين من الجوزة النحاس وهو يضحك ويكح، ويكح ويضحك ويراقب نملة تمشى على الأرض وتتعثر. سألته له وأنا اتهيأ لأخذ دورى فى أنفاس سميكة من جوزته:
ايه رأيك نعمل حوار يا صاحبى
مع مين لامؤاخذة؟
مع مسؤول كبير
لمين لامؤاخذة؟
صفحة «فرفش كده»
واحنا من امتى بنحور فى الصفحة لامؤاخذة؟
مش ده اقتراحك ياعباس؟
امتى ياجدع انا اقترحت الحوار ده؟
امبارح
خلينا فى النهارده.. امبارح ده مات واللى مات.. مايصحاش.. لا بكا يرجعه ولا كلام يوجعه، ثم مد أصبعه وهرس النملة وهو يضحك ويكح ويكح ويضحك.
طيب تقترح نعمل أيه الأسبوع ده؟
أيه رأيك لو تعمل حوار مع مسئول كبير!؟
فكرة جديدة فعلا!.. بس مع مين؟
معايا
بصفتك ايه لامؤاخذة
مسئول كبييير.. قالها عباس، وحين وجدنى أتشكك فيما يقول، فز من مكانه ورفع يديه للسماء وهو يدور مثل راقص تنورة ويقول: مسئول والسؤال لغيرك يارب مذلة.. مسئول والتصريح ميزان ورمانته بتحسب دبّة النملة.. مسئول والمسئولية أصول ورسالة بعلم الوصول
مسئول عن مين يا عباسية.. ماتقعد وتهدى كده..
مسئول عن نفسى بالنهار، وعن عد النجوم بالليل، والنجوم بتولد نجوم، والغيوم زعلانة من الخدمة والإهانة.. والمطر دموع.. مسئول عن مراقبة الشمس وهى يتطلع بعد الفجر تمد خيوطها وتغزل النور للكون.. بس الشمس عمرها ما بتنور العقول، مسئول عن قلة نومى وتربية همومى والمحافظة على الفراغ.. هو انت فاكر الفراغ ده شوية.. ده حمل تقيل وغم وهم ما يتلم.
ثم سقط عباس، وقبل أن يمد يده من جديد إلى الجوزة النحاس، وضع فمه فى أذنى وسألني:
مين الأخ اللى معانا ده.. تعرفه.. ولا هو اتولد دلوقتى بالصدفة؟
ده الفنان محمد صبرى رسام الصفحة
فناااااان.. آاه
ماهو مابيرسمش حد غيرك.. وانت مابتشوفش غير نفسك!
أنا فعلا معجب بيا.. ولعلمك انت الكسبان فى حوارك معايا.. آه.. هيبقى انفراد وربنا.. ثم كح وضحك وضحك وكح وقال: ولعلمك برضو.. أنا أول مرة أقعد مع شخص من العامة!
ومين العامة من وجهة نظرك؟
أى حد.. غيري
طيب.. ممكن نقلب صفحة التواضع ونبدأ الحوار
باصيلى انت بس وانا هشوت.. وزعلى وهتلاقينى بجيب اجوان.. حزّمنى وانا هارقص بلدى وأفرنجى.. اعزف لى وأنا اسمعك عبد الحليم
أستاذ عباس كيف تقرأ مشهد الخريطة السياسية فى العالم العربى خلال العشر سنوات الأخيرة، وانهيار أنظمة وصعود أخرى، وتلك الحالة من الفوضى والتخريب وعدم الاستقرار التى تحدث فى دول عربية بعينها؟
كله رايح!
وماذا عن تلاحق التطورات فى أفغانستان.. من سيملأ الفراغ الذى تركته الولايات المتحدة هل هو التنين الصينى أم الدب الروسي؟
الحمار التركي!
الأحداث الأخيرة فى مطار كابول أثبتت فشل الإدارة الأمريكية بقيادة بايدن فى حماية عملية الإجلاء هل هذا يشير إلى بعث لدور الرئيس الأمريكى السابق دونالد ترامب لزعامة تحرك جمهورى للإطاحة بالديمقراطيين من الحكم؟
تعرفش المعلم بقدونس؟
ماحصليش الشرف
المعلم بقدونس ده صاحب شركة استيراد وتصدير كبيرة عقبال أملتك.. بيستورد كرنب ويصدر محشى.. وله حكمة مش هتسمعها غير منه وتلخص لك قصة رؤساء أمريكا كلها..بيقولك: «ما أسخم من ستى إلا سيدي».
ومرة أخرى وضع ابن عباس فمه فى أذنى وهو يقول: مين الأخ اللى رامى ودنه معانا ده.. من أول القعدة.. تعرفه.؟
ده محمد صبرى.. رسام «فرفش كده»
يعنى أمان؟
آه.. أمان.. أمان ياللالى.. ياللالى أمان
حيث كده بقا، ماتسيبك من السياسة وتدينى فى الكنافة.. وعلى رأى الست هيفا وهبى «وينه حمو بيكا.. حبيبى هون.. ماحدش يزعلى حمو.. أنا بشوف فيديوهاته.. ساعات بتستفزوه.. محدش يستفزه»
طيب ما الأسهل أعمل حوار مع هيفا
سيب لى انت الطلعة دى وانا هظبطها، وانت تعملنا حوار مع مسئول كبير!
اللى هو مين؟
الأخ اللى قاعد معانا ده.. محمد صبرى رسام الصفحة.
