أعلنت هدى بدر والدة الطفل رشيد، اكتمال مبلغ العلاج الخاص بمرضه النادر وهو "ضمور الأعصاب الشوكي"، حيث إن تكلفة الحقنة الواحدة 35 مليون جنيه.
ونشرت بدر على صفحتها الخاصة على موقع التواصل الاجتماعي "فيسبوك"، صورة لمبلغ 35 مليون جنيه معلقة عليها قائلة: "الحمدلله، تم تجميع المبلغ بالكامل! وعدتونا ووفيتم... شكرا ليكم".
وأضافت في منشورها: "لما رشيد اتشخص بمرض الSMA وعرفنا ثمن الحقنة اللي محتاجها، سلمنا أمرنا لله ودعينا ربنا يقوينا على الاختبار ده.. متخيلناش ابداً أننا هنوصل للحظة دي وإن حكمة ربنا تكون إن رشيد يخلق الحالة دي من التكافل الإجتماعي والحب والخير والأهم ان الناس تتعرف عن المرض دة ويبقى في أمل لأطفالنا إنهم يتعالجوا بفضلكم".
ووجهت بدر رسالة قالت :" شكرا لكل اللي دعم رشيد.. لان رشيد بسببكم هياخد الحقنة وان شاء الله أطفال كتير من بعده! دعواتكم نبدأ رحلة العلاج الأسبوع ده وتفضلوا معانا خطوة بخطوة لحد ما نتطمن عليه".
وأوضحت والدة الطفل قائلة :" شكر خاص لEـFG Hermes، المؤسسة الوحيدة اللي اتبرعت لرشيد وبقيمة ضخمة كمان 2,5 مليون جنيه، أنقذتونا على أخر لحظة وخلتونا متستناش وقت أطول".
وأختتمت منشورها قائلة :" حابين نستغل الفرصة دي ونوصي نفسنا أولا ونوصيكم، نبذل نفس المجهود وأكتر لليال وآسر. ثقتنا فيكم إننا نقدر في نفس الفترة، وأقل كمان، نجمع نفس المبلغ لكل واحد فيهم عشان ياخدوا الحقنة، ومن بعدها إن شاء الله باقي الأطفال مصطفى وهاندا وغيرهم".
يذكر أن عائلة الطفل رشيد قد دشنوا هاشتاج على وسائل التواصل الاجتماعي "فيسبوك، تويتر، انستجرام" «انقذوا رشيد» بعد أن تم تشخيصه بمرض نادر وهو ضمور الأعصاب الشوكي، وعلاجه يكمن في حقنة تكلفتها 35 مليون جنيه، مطالبة متابعي السوشيال ميديا التبرع لابنها لانقاذ حياته من الشلل مدى الحياة.
