مراد ناجح عزيز
قالوا للميّت ارجع
قبل رجليك ما تخطّى..
بره الغُلاف
قال أنا ما سدّقت اتغيّرت
وبقيت شفّاف
الضّحكه من غير خوف
الكلمه من غير خوف
أنا اللى بره حساب..
الظّروف
والوقت
وقلة الحيلة
أنا واحد م اللى سابوا
الحياة جوّه الهدوم..
شِيلة
ومفيش بينى وبين أى شىء
ارتباط
الجرح لَم وما لوش أثر
ولا فيش ديون ف الحب
خلتنى عاجز بصر
مش شايف خطوتى الجايّه
أرجوك ماتصحّينيش دلوقت
سيبنى نايم
والحلم لسّه ف عنيّه
مجرّد خِصام
امشى
الحياة من غيرك
شباك البحر هيقفل ابتسامته
ع البلاد
والعباد
ومراكب السّفر
امشى دقيقة
أو امشى دقيقتين
وأنا هأقول
كان وعد الحر دين
ايدين تمسك ايدين
وتلم طرح الأمل أحلام
امشى
وأنا هأقول للحزن
سيب حطان القلب على حالها
لو مالت
أنا كنت ساند بيها كسرة الأيام
امشى خطوة
أو امشى خطوتين
وأنا اكدّب كل الناس ف غيابك
بعد سنين
وهـأقول مجرّد خصام
زى ما تحبّــــــى
صباح الخير
يا اكتاف أبويا الجبل
وضحكة أمى الأمل
والأغنيات الجميلة
صباح الخير
يا نظرة عنيكِ البلاد
اللى ماعرفش غيرها
ولا اعرف ربيع يتعاد
ومكنش ف أوّله
طيفك
صباح الخير على كيفك
وزى ماتحبّى
تشتى السّما
وتمطّر
والليل يأخر خطوته
لحد ما حزن الغلابة يروح
صباح الخير من غير شفايفك
نوح
اسمعها عاد
وارد عاد
والكون قصادى
لا نور يشقشق
ولا عصفور يزقزق
ولا طلقة ترشق ف صدر الجناة
وتقوم أفراح القصيدة
زاد
الحبُ
ناظم حكمت
