نظرت إليه نظرة المندهش والذي يسمع كلام ربما لا يقبله عقل شخص لديه ذرة من العقل .. ولكن طالما أن الوسط الرياضي فقد عقله ..ودخلنا في دوامات من الكلام وسط بحار من الاستهتار بكرة القدم المصرية قلت اطرح عليكم ما قاله لي احد المشجعين كان يجلس إلي جواري في مقهى نتابع عبر التلفزيون.
وجدت الشخص الجالس إلي جواري يقول : تعرف يا استاذ حل الرغي الفارغ ده ايه ؟
قلت له : تفضل
قال : احنا طالما بنحب الدوري اوي اوي كده يبقى نركز فيه وننسى أي بطولة تانية غيره فلا نخلي اي نادي يلعب في بطولات أفريقيا ولا كأس العالم للأندية ولا سوبر افريقي أو سوبر مصري ولا حتى بطولات أندية عربية ... يبقى الدوري هو البطولة الوحيدة اللي بتلعبها الأندية المصرية .
نظرت له باستغراب شديد ..فقال لي : مش مستوعب كلامي ليه يا استاذ .. انا بتكلم كلام انا عارف أنه مش المفروض يتقال ولا يحصل واننا لازم نكون موجودين أهلاوية وزملكاوية في البطولات الأفريقية وكل المنافسات القارية والعالمية والعربية لكن إذا معمناش كده تبقى كل موسم أزمة و خناقة وصراعات بين المسئولين في الأندية والاتحاد والرابطة وغيرها.
قلت له لكن يا اخي العزيز هذا الاقتراح ستكون نتيجته خسائر فادحة .. وأنه لا يجوز ان نبتعد عن المنافسات الأفريقية والعربية والعالمية على مستوى الأندية واكيد المنتخب سيتأثر . رد بسرعة : احنا بنخسر من صورتنا ومن اللخبطة والهيصة يعني ينفع طقم حكام اسباني جاي يدير مباراة قمة الكرة المصرية وبعدين يقولوا له روح احنا معندناش مباراة قمة ولا غيره. علشان ظروف قهرية ؟
رغم جنون الاقتراح الذي قاله جاري في المقهى إلا أنه فعلا يتناسب مع جنون الوضع الكروي المصري.
