وإن كان الباطل بيشق ضلوع المعروف
أنا سايب دمعي على خدي لحد ما ينشف
والناس حواديت
والحلم الساكن فى قلوبنا
واحنا بنتنطط تحت البيت
ويقولوا الخلق عيال عفاريت
جواها عجوز
بإيديها بتشرب من نيلها
بايديها بتقيد الشمعة
وأهى قاعدة بتحكي في الحواديت
أنا بحلم بيكي يا بهية وبفرح العيد
لساكي أصيلة وقوية
لساه العقد الزينة جديد
الكل بيكبر ويعدل
ويقول للواد اوعى الكبريت
واتلسع الكل من الكبريت
على فين القطر اللي يودي يلقى الأحباب
يا اخونا أنا قاطع تذكرته
ذهاب وإياب
واخدك بين حضني وتنهيدي
وحاسيب الحزن هناك ع الباب
عطشان أشرب من شوق نيلك
تسكر عيني بسمار لونك
على فين هيودوني عيونك
والحب فى قلبي ما لوش أسباب
أنا لسه شايفنى على حجرك
بتهشكي وتقولي يا سيدي
باصص ع الحاجة الحلوة اللي
فى إيديكِ وساكنة فى وريدي
أنا حاطط روحى على كفوفي بوهبها لك
بكفايه تشاوري برموشك
وتلاقي الرد على سؤالك
والحلم المتبعتر قادر يمحي الأوجاع
وإن ضاع الحلم مع عنيكي
حايضيع لما الأحلام تتباع
