مجدى نجيب ..يا حبيبتى يا مصر

مروح المغربية
والولاد فوق شفايفهم البسمة..
رغم ليل الحزن بسمة فرايحية
والنجمة ع البيوت..
نجمة صيف مندية
والقمر دل سبحته..
على سدر المدينة، سبحته الكهرمانية

اقرأ أيضاً|  «العويس الثقافية» تحتفي بالشاعر الكبير حسن طلب 27 فبراير



وف ايده كام وردة
والنيل فارد دراعه الطويل..
حبة نغم فضة
والشوارع ناس وناس.. وناس
وف كل واحد كام بلد من الاحساس
يا بلدنا يا بلدنا
يا بلد تنباس
يا بلدنا ياللى حاضنة فى القلوب الناس
الحب رامى زهرته الخضرة على الأوتار
على الأوتار
غنى يا صاحبى..
غنى للمدينة اللى سهرانة..
لاجل ما يغيبش النهار
عزفت ع الوتر على ضحكة القناديل
نزل القمر..
يشرب من شفايفنا فرحة المواويل
ويغزل معانا ضحكة الإنسان
ويمسح..
دمعة الأحزان.
-2-
باجرى بلهفتى
شايل فرحتى
وبسمة دنيتى
وضحكة سنبله مسنبلة فرحانة
وموجة البحر اللى عطشانة
وكلمتى الدفيانة
وزهرة من فرحها الكثير.. فى الضل حرانة
عشان تضحك عيونك يا حبيبتى..
وسط النجوم الصاحية.. سهرانة
يا أم الربيع من غير ميعاد
وحكايات السندباد
عيونك طريقى
وحضنك صديقى
وضحكة منك وسط حزنى تبل ريقى
يا حبيبتى..
يا حبيبتى.. يا مصر