..زمان واحنا صغيرين كان فيه برنامج جميل بيتذاع في الراديو كل يوم الصبح.
البرنامج ده كان اسمه «كلمتين وبس» وبيقدمه الفنان الكبير فؤاد المهندس ، وبيكتبه الكاتب الكبير أحمد بهجت.
البرنامج ده كان عبارة عن نقد اجتماعي ساخر للاوضاع السلبية في المجتمع ومحاولة تقويم السلوكيات الخاطئة من جانب بعض الناس.
وأحلى حاجة في البرنامج ان النقد كان بعيد تماما عن التجريح ، وكمان كانت النصائح اللي بيقولها الفنان فؤاد المهندس كانت بعيدة عن الاسلوب الخطابي والدروس الاخلاقية التي تؤدي الى نفور المستمع.
فؤاد المهندس كان بيحط ايده على الجرح من غير ما يضغط عليه وبيوصف العلاج بشكل بسيط وتلقائي يفهمه الانسان البسيط قبل الشخص المتعلم وطبعا بيحط بصمته الخاصة المغلفة بخفة دمه المعروفة.
من كام يوم استمعت بالصدفة لاحدى حلقات البرنامج بعد مالقيت احد الاصدقاء ناشرها على صفحته.
بصراحة فضلت اسمع الحلقة كاملة وانا في منتهى السعادة والاستمتاع ، مش بس عشان الحلقة اشعلت بداخلي مشاعر الحنين للماضي واجمل سنوات الطفولة والصبا ، لكن عشان حسيت ان الفنان الراحل بيتكلم عن اوضاعنا الاجتماعية النهارده.
تعالوا استمتعوا معايا وشوفوا فؤاد المهندس كان بيقول ايه من 30 سنة.
علموا ولادكم يقولوا للاكبر منهم « حضرتك .. مش يقولوا انت».
علموهم يقولوا «نعم .. مش يقولوا إيه».
علموهم يوطوا صوتهم وهم بيتكلموا.
علموهم ما يحطوش رجل على رجل قدام حد كبير.
علموهم ما يقعدوش في الاتوبيسات وفيه حد حد كبير واقف جنبهم.
علموهم ياخدوا معاد قبل ما يروحوا يزوروا حد .. مش يطبوا عليه فجأة زي القضا المستعجل.
علموا ولادكم كمان يخبطوا على الباب قبل ما يفتحوه.
لوانت معزوم لازم تقوم اول واحد من على الاكل ، ولو انت صاحب العزومة يبقى لازم تستنى لما كل الضيوف يقوموا .. الاصول بتقول كده والذوق بيقول كده.
لما تدخل بيت حد غريب ماتقومش من مكانك غير لما حد يقولك.
ماتطلعش ورا بنت على السلم .. يا تطلع انت قدامها يا تستنى شويه وتطلع بعدها.
وانتي كمان لو حد طالع وراكي أقفي في كورنر السلم عديه وبعدين اطلعي.
قول شكرا لأي حد بيعمل معاك حاجة كويسه .. وقول آسف لما تغلط عشان ده مش هيقلل منك .. بالعكس هيكبرك في عين الناس.
الناس المحترمين ولاد الاصول زمان كانوا بيربوا اولادهم كده ، ولو عايزين خير و بركة زمان ترجع لازم نربي أولادنا كده.
مش كده ولا ايه..»
ايه رأيكم في الحلاوة والجمال ده .. شوفتوا أد ايه كلام بسيط ومعبر
كلام يدخل القلب على طول لانه طالع من القلب.
مفيش فلسفة ولا خطابة .. فعلا البرنامج كان اسم على مسمى «كلمتين وبس».
هما كلمتين فعلا بس فيهم الخلاصة .. دروس تربوية واخلاقية في صورة كبسولة سريعة وخفيفة على القلب والروح.
تفتكروا مين فينا النهارده بيربي ولاده كده؟!
عشان كده النهارده تلاقي الولد اول ما رجله تشيله يبجح في ابوه وامه ويعلي صوته عليهم.
وتفتكروا اللي بيتجاوز مع ابوه في البيت هيحترم المدرس بتاعه في المدرسة او اي راجل كبير في الشارع .. طبعا لأ.
وعلى رأي عمنا فؤاد المهندس الله يرحمه « لو عايزين خير و بركة زمان ترجع لازم نربي أولادنا كده».
مش كده ولا إيه..