قبل ما اخواتي وجدودي
يموتوا على ايدك في غارة
قالوا قُبـَّـة
بس فاضية
قالوا قوة
بس واهية
قالوا طوبة
بس داهية
قالوا عزوة
بس غدارة وجبانة
قالوا آخرك قبل آخري
قالوا وخري الفوز معانا
وبأمانة
كانوا صادقين الحبايب
الله يرحم - الله واخد - الله جايب
خلِّي بالك
كنت عارف
كنت باسمع نبض قلبك
أعلىٰ من صوت القذايف
رغم رمشي الكان مغمض
كنت شايف
السلاح في إيديك بيضرب
وانت خايف
كنت عايز بس اقولك
لما تغدر، وتحاربنا بكوم ذخيرة واحنا عزَّل مش في صالحك
من بساطة ستر ربك
واسى قلبي وخض قلبك
شفّ حيطَك طوبي شافك
سد حيطي رغم هدمُه قام يصدك
أمَّـا عنِّي
عايز اقولك
كل جد يموت
كرامة
كل ست تموت
سلامة
كل طفل يموت
حمامة
كل شاب يموت
بيحيى
كل لحظة تفوت هتدرك
عايز اقولك
لو هَـ يدُّوا إشارة خضرا
كان وجودك راح وداب
كان نهارك ساب وليِّل
مهما تتكَبَّر وتكْـبَر
برضـُه بنشوفَك قُليِّـل
بالجِرامْ يكسب مَقامِي
عَ الميزان وزنَك يشيـِّل
عضمي زان صالِب لِي عُودي
عودَك التعبان مِمَيـِّل
لو قانونك ساد وسيطر
كل زرع مصيره يدبل
انت أجبن من بيانك
انت تافِه، انت عيِّل
لو بأمر الله قابلتك
وعد منِّي تموت وهافضل
بس يدُّوا إشارة خضرا
