احكى يا جدي وودني معاك
احكى ايامك احكى ألامك
احكى الفرحه وهات أحلامك
احكى يا جدي وقول على مهلك
أيام مجد بلادي ومجدك
2
عارف يا ابني
وسط اليأس بيجي النور
عزمك يا ابني سيف الحق
صوته بيكشف كل الزور
سيبك من كداب الزفه
انت الريس ......
طول ما في إيدك يا ابني الدفه
جدك عاش العمر حروب
فوق لجبال وف وسط بحور
عارف يا ابني
شوكه اتزرعت غدر في أرضك
شوكه شيطاني
ومشيت حافي ودست عليها
لازم طبعا توجع رجلك
وعشان تطلع ......
لازم تنزف نقطة دم
لحسن بالميكروب تتسمم
وزمان قالوا مش ببلاش انك تتعلم
3
هي دي يا ابنى حكاية حرب
لسه الكون عنها بيتحدت
عارف يا ابني
حبة مطاريد مالهم مأوى
جُم على سهوه
نزلوا في غفله
سرقوا الدار والأرض بعافيه
ويّا الحيله
أعلنوا دوله ونصبوا الحفله
فرح الغرب عمل هليله
عارف يا ابني
مصر بقالها زمان مقصوده
مصر بدايه وليها العوده
لكن ربك هو حاميها
من كل الشياطين أعاديها
عارف يا ابني شريط قدامى
بيرجع تاني
مارد بالطيران بيفجر..
كل حدادي البر التاني
اضرب تسلم ايدك عدي
يالله يا خالد.. يالله يا حمدي
اعبر بينا البر التاني
خلّى سلاحك يا ابنى صيامك..
تفطر على نصر الرحمان
خلّى سلاحك يا ابنى إيمانك ..
واضرب اضرب فى المليان
شد السلم فوق الساتر
اطلع يا ابنى لفوق للعالي
دك حصون وغرور الغادر
ارفع راية مصر وكبر
للى جعلها آمان وسلام
بدد يا ابني بنور رشاشك يأس ظلام
قالها رسولنا: خير جنود الأرض جنودنا
ألف صلاه وسلام يا رسولنا
ألف صلاه وسلام
4
عارف يا ابني
كان لعداء بيموتوا بخوفهم ..
من بركان السخط في وشى
عارف يا ابنى عمك حبشي
أجبن واحد كان في العزبه
كان في الشمس يخاف من ضله
ولا يمشيش في الضلمه لوحده
أهو ده صاحبي
جاري وكان في الوحده معايا ..
وكان في الجبهه
لسه بيرفع إيده هيضرب بالرشاش
جه ليهودي شلل رعاش
عمك حبشي جاب ليهودي شلل رعاش !!!!
سلم كل كتيبته ومات
يالله فى داهيه
شفت بعيني عمك حبشي كما البركان
نار بتولّع كل مكان
مين كان قال على عمك حبشي هزيل وجبان؟؟!!
عمك حبشي وغيره وغيره من الأبطال
إللى أسر خمسين دبابه
واللى اتوغل جوه الغابه
طالع بإيديه كلاب وديابه
شغل رجال.. لسه فاكرهم
إللى هناك فى الجنه بينعم بالخيرات
واللي بيحكي الحرب لأهله في الحكايات!!!!
5
عارف يا ابني..
عدينا سينا.. مش معقول
عدينا سينا بعون الله
عدينا سينا هزمنا الغول
لأ مش غول
إحنا هزمنا الخوف جوانا
وف رمضان.. في اكتوبر 73
ليلة القدر كانت ليلتين
إيه راح اقول
عارف يا ابني اقرا فنون الحرب كويس
تبدأ يا ابني بقرار ريس
نفسي أعدى البر التاني
واضرب تاني
نفسى يا ريس
نفسى يا ريس
