ازيكم يا حلوين يارب في السعادة والهنا فرحانين ومع ماما وبابا واصحابكم مبسوطين
كل سنه وأنتم طيبين بمناسبة المولد النبوي الشريف، عارفين حبايبي الحلوين الصغنين أبو سيدنا محمد اسمه ايه؟
:«عبدالله بن عبد المطلب»
وعارفين مامته حبايبي الحلوين كان اسمها ايه!
«آمنه بنت وهب»
سيدنا محمد صل الله عليه وسلم حبايبي وهو لسه جوه بطن مماته باباه (عبد الله) مات ومكنش لسه شافه لأنه مكنش لسه اتولد.
طب عارفين حبايبي الحلوين سيدنا محمد صل الله عليه وسلم اتولد امتي!
اتولد في عام اسمه الفيل في 12ربيع الأول وفي نفس العام ده أبرهه الشرير كان عايز يهدم الكعبة بالفيل لكن ربنا سبحانه وتعالى حمي بيته الكعبة.
عارفين حبايبي الصغنين مامت سيدنا محمد صل الله عليه وسلم لما ولدته ندهت لجده عبد المطلب ولما شافه جده عبد المطلب لقاه طفل شكله جميل اوي وسماه «محمد» ومعني اسم سيدنا محمد صل الله عليه وسلم أن ربنا سبحانه وتعالى في السماء يحبه ويحب أخلاقه، والناس في الأرض تحبه وتحب اخلاقه الجميلة
حبايبي الحلوين الصغنين عارفين اسم مرضعة سيدنا محمد صل الله عليه وسلم ايه؟
«حليمة السعدية»
في الوقت اللي كان فيه مرضعة سيدنا محمد صل الله عليه وسلم أخذته للرضاعة كان معروف عن أهل قريش أنه بيأتي لهم مرضعات من البادية وهي مكان جميل أوي فيه زرع وهواء مفيدين لصحة الطفل عشان يكون طفل قوي
وكانت حليمة السعدية حبايبي فقيرة أوي وعندها حمار ضعيف أوي لكن لما أخذت سيدنا محمد صل الله عليه وسلم معها، حمارها الضعيف بقي قوي أوي وكان عندها ناقة ضعيفة جدا، لما سيدنا محمد صل الله عليه وسلم راح البادية المكان كله بقي جميل ونمي الزرع فيه والناقة لبنها بقي كثير أوي
وفي كل عام حبايبي الحلوين الصغنين في 12ربيع الأول من السنة الهجرية بنحتفل بمولد سيد محمد صل الله عليه وسلم وبنجيب حاجة حلوة اسمها "حلاوة المولد" احتفالاً بالمولد النبوي الشريف
يلا بينا حبايبي الحلوين نصلي على حبيبنا محمد صل الله عليه وسلم.
