في الـمبتدا أذكر الله
هوّ خالقنا وْ نا شينا
و عاطينا شمشه وضلّاه
رازق راكبنا وْ ماشينا
***
يا حلوة زينك ماليه زىّ
عُقدِك ولا عقد " شمّـة"
وردة خدودك على أدىّ
ولا طُلت للورد شمة
***
أبدى بـمديـحى فى طه
سـيّد "ربيعة" و "غالب "
طبْع الـخلايق خـطاها
و تّـوب والطبع غالب
***
حطيت ع الجرح كفّى
مانا الطبيب المداوى
رشّة من الحب تكـفِى
ولا كلام الـرّداوى
***
لا توطّى راسك لـمخلوق
ولا تشكى حالك لشامت
دا العبد ينباع فى السوق
والحُـر يخشَى المشامت
***
الدنيا لا تسوى قنديل
ولا تسوى إنك تطاطى
ما يقندل العيشة قنديل
غير مشْى ابو أصل واطى
***
واسأل على اللى يسال فيك
وان غبت عنه يجيلك
وان قلّ مالك يسالفيك
ويجنّـبك رغْى جيلك
***
بعدك ما واحد عجبنى
ولا خدت صاحب بدالك
اسمع كلامى اللى جابنى
وان عبت قول ما بدالك
***
من ناعم الصبر سفّيت
وفتلت منه حبالى
و كبست جرحى ما خفيت
ولا فارق الجرح بالى
***
صاحبى اللى صاحبته مسافات
سافـر وطـوّل غـيابه
كام صبح عدّى ومسا فات
لا جا ولا جا جوابه
***
صاحبى اللى داينته كذا دين
لـمّا داينّى اشتكانى
و نصبْلى فو السوق مزادين
و عملنى قصّة وْ حكانى
***
ياللى انت جايلى معاتبنى
ليه بعتنى بالخسارة
و حـرقْت قمحى مع تبنى
دا جبن ولّا جسارة
***
شايل همومى فْ صناديق
ويش املكه غير همومى
وان كنا جينا فْ سنة ضيق
أنا ابيع عشانك هدومى
