بعد ابوك وامك ياولدي
ملكش حد
بكره أنياب الطمع
تظهر بجد
اللي حبك لاجل مالك
واللي كان مشغول بحالك
واللي نفسه يهد حيلك هد
لو صرخت بعلو صوتك
أو سُكُت وطال سكوتك
مين يهمه يسمعك
مين هيمسح دمعتك
مين ينفعك
مين ال لوكسر
الزمان ظهرك
هيقدر يرفعك
مين ال عنده قلب
يسمع شكوتك
مين ال تحكى له
يهمه قصتك
أُمك وابوك دول هُما بابك والحيطان
هُما جدار الستر
رُمانة الميزان
هُما الرئه بعد الشقا
هُما الأمان
بعد ابوك وامك لايمكن
حد تانى يحتويك
ولا أي نبض لأي قلب
يحس بيك
هُما نَبع إلهى صافى
يحن ليك
كل إل حبوك ف الحياه
علشان مصالح للأسف
أُمك وابوك حبوك
بدون أدنى هدف
بعد ابوك وامك هتعرف
مين عدوك من حبيبك
وإل قلبه راضى عنك
وإل قلبه مش دارى بَك
والعدو سهامه ناصبها
قلبه يتمنى يصيبك
بعد ابوك وامك
هينكشف القناع
بكره يبان مين اشترى
ومين ال باع
مين ال باعك للشيطان
مين ال باع عِشرة زمان
مين ال عايز مركبك
من غير شراع
