ياه يا نبيه
ليه مستعجل؟
وانت قضيت عمرك مستحمل
فجأه تسلم
من غير يا يابا ما تيجي تسلم
قلبي يا ناصر كان مليان
سنتي الفاضي في قلبي دا كان
بيه باتنفس
لحظه يكون ورده في بستان
ساعه يكون فتحة بركان
قبل ما يحرق غيرى يا صاحبي
يحرق فيا وريد شريان
حبه في حبه السنتى اتسد
والبركان جوايا امتد
قول لي ازاي ها استحمل قول
بقى معقول
جبل الهم تشيله رجول
مش معقول
عندك حق
كنت باسابق روحي واجيلك
كنت احكى لك
كنت بافرغ همى في همك
كنت تقول لي ايه هيهمك
كبر راسك
لك حراسك
سلم أمرك
ربك لا بيغفل ولا نايم
كله هيفنى وهو الدايم
ياااااااااااااااااه يا نبيه
لو كنت اعرف ......
إنك لما تموت راح اموت
كنت اديتك عمري يا صاحبي
بس تعيش
يااااااااااه يا نبيه
لما الفرسان يقعوا يا صاحبي
إيه راح يعمل باقي الجيش
يااااااااااااااااااااااااه يا نبيه
مش متصور
أعمل ندوه ازاى ما تجيش
ياااااااااااااااااااااااااه يا نبيه
شمس بتغرب عز الضهر
والله ارتحت يا صاحبي وقتلك
هو المهزوم هم وقهر
غصبن عنه
صوتك عايش جوه حروفك
جوه قلوبنا
نخل ونهر
ياااااااااااااااااااه يا نبيه
قلمى الساكت من كام شهر
ليه صرخته.. ليه بكيته
كان يتقوى بقلمك لكن
موتك يا با كسر له الضهر
