لولفيت الدنيا بحالها
رحت شمال أو رحت يمين
مش هتلاقي ف نص جمالها
روح وبساطه وعزه ودين
حبها صافي
حضنها دافي
قلبها وافي
يساع ملايين
طفله بريئه بتلعب أولي
تخبز عيش من قلب الطين
شابه جريئه
روحها رقيقه
ويا راجلها تشيل وتساعد
وبتتعاهد تبقي دراعه
تزرع أرضه
وتصون عرضه
تحفظ بيتها بيد قويه
تسقي وتزرع
تجني وتقلع
حتى ف عز مرضها عفيه
ومستنيه الندهه تقوم
راكعه وساجده لرب القوم
امي وأمك
اختي واختك
يبقي يا بختك لو تراعيها
لما تلم الشوك وتقيده
لما تجيب لخبيزها وقيده
لما تكيف روحها بروحها
ويا ظروفها تخطى الصعب
وأما الفرصه تجيها ف يوم
تمسك فيها لوجت مره
لوفي الطب تكون استاذه
لوفي الكيميا أو فى الذره
تسبق كل اللي يسابقوها
تبقي وحيده
تبقي فريده
تبقي جديده بآراء حره
لما تشوفها قوام تعرفها
م الشخصيه
وتقول هي
بنت بلادي
وأم ولادي
المصريه
