يا بنت الإيه
قدرتى ازاي
تعدي السور
وتقفي عليه
فلا نزلتي لبحر الهم
ولا سيبتيني جوه اليم
شغلتيني .. وخدتيني
رفعت عينيه م الميه
لأول مره وأخرها
اشوف حوريه جنّيه
وكان كل الجسد غرقان
لكن دلوقتي صار نصين
وزاد تعذيبه بين الاتنين
هيعمل إيه
ونص بيسمع الأنغام
وشايف جنة الأحلام
ونص طعام
حيتان الهم بتمصمص
بقايا عزيمته من أزمان
فلا اتشاهد ولا اتحرك
ولا اتسبل ولا اتكفن
فصار تمثال
يحس الكون ويتمنى
يحسه الكون
يعيش مربوط
بضي البسمه في عيونك
ولو لحظه بعد عنك
هيغرق تانى نصه الفوق
وتاكل فيه حيتان الشوق
يا بنت الإيه!!!
