«سجين».. قصيدة للشاعرة نادية فتوح

رمان وتوت

ومنين يفوت

 إحساس سجين،

من بين تروس المقصلة ..

شوق السنين

عشق وغرام

وحاجات كتير متفصلة

 وهموم ساعات ،،

لحظات عجاف

ثورة جنون

بيك ترتوي ..

ويا هل ترى

فين ألتقيك 

وف شرع مين

كل الثواني بتنتفض

بركان حنين ...

فيض اﻵهات

بتمد في العمر اللي فات ؛

سيل من فرات

فرع الأماني الغامرة ...

شهدك يانيل

تمر ف نخيل

واللي استوى

من نار حيارى

 ومظلومين

دول في الهوى

متعشمين ؛؛

فجر الليالي المقمرة ..

واشهد يا ليل

على شعر ليل

مستني لحظات الحياة

وانت الدليل

على حلم متحني بلقاه

فرح وهنا ..

كل المنى

 تكمل معاه

على كف من حبة نهار

يبدر في ارضك يا قمر

احلام كتير متنتورة 

بس انت فين ؟؟