حرام تحزن عيون زيك
يا ساقية الدنيا من ضيك
يا شايلة مرار
في ليل ونهار
وانا اللي حلمت اكون شالِك
وموالك في ترحالِك
واكون لو حتى طيف سارح
يعدي ف مرة على بالِك
كتبت الشعر في عنيكي
قصايد تحكي عن حسنِك
وشفت الكل حواليكي
محدش حس يوم حزنِك
وانا اللي عشقت فيكي الليل
ومين في الدنيا هايساعنا
ويسمعنا
يلم الشمل غير حضنِك
يا أجمل حاجة في الدنيا
ومين في الدنيا دي قدك
وتايهه الفرحة على خدك
ومين في الحزن خد يدك
وطَيِّبْ جرح أيامك
أنا مسكين
عشقت عنيكي بإرادتي
ومش مجبر على الحلفان
ولا بْيَدِّي أشيل عنك
واحقق شيء في أحلامك
حرام الحزن مش توبك
ومش قدرك ومكتوبك
انا لوحدي اللي شفت مزايا
في عيوبك
وعاجز حتى اكون جنبك
واكون الحلم في منامك
عليل قلبي اللي عاش عاشقك
وشاف الذل من عشقك
لكن حبيتك انتي بجد
وماقدرتش أبوح بالسر
لعنيكي
ومش قادر أخبي كتير
فساعديني ومدي اديكي
لو مرة
ولمي الباقي من قلبي
وسيبك م اللي قال واتقال
عشان مايهمنيش أصلا
وما يهمش كمان خوفي
ولا الحلم اللي مات فيا
ومش عارف أشوفك فيه
حبيبتي ومش مجاملة بجد
وشايفك انتي أجمل حد
أجيلك بالغرام كله
وعشقي ف قلبي مالهوش حد
اطيب قلبك انتي ازاي
وانا اللي غرقت في بحورك
وفيه بيني وبينك سد
عشقتك بس محاولتش
أتوه واغرق في موج قلبك
واطيب كل دقاته
وخدني معاه في جزر ومد
مافيش في الحب ايد تتمد
وعين تعشق في تفاصيلك
انا بس اللي من حقي
ادوب واعشق ومش هاتهد
عرفتي خلاص يا مولاتي
سبب عندي ومحاولاتي
انا اللي عشقت من فترة
وانا اللي وقعت بالنظرة
ولسه يادوب أنا هابدأ
واسمي الله
واكمل فيكي معركتي
واحقق برضه نصر أكيد
عشان تستاهلي نهتفلك
ونعزفلك
نشيد الصبر ع الأبواب
واجيلك بكره اغنيلك
حرام تحزن عيون زيِّك
يا ساقية الدنيا من ضيِّك
