ليه يا وليًه يا فَرارجيًه يا مرابطه فى سوق لِتنين .. كنتى زمان قبل التسعيره تبيعى الفرخه جعانه يومين .. ليه يا لئيمـه بقيتى رحيمه تحشى الحُوصَلَه لباب رطلين .. وزلـط ياما فى كل حمامه ودَكَـر البطَ دُرَه قدحيـن !
أما الزبده الشحم البارده عليها القَرع أخضــر مَدقوق .. وتشيلى حاجب وتفوتى حاجب وتقولى قَــرًب عندى ودوق .. دوق زبدتنا من جاموستنا دى مافيش منها فى كل السوق .. وارمى يا قاتلَه فى حِلفان باطله واحشى كلامك صلاة الزين !
ويا جَزارنا ويا خـواجتنا ياللى تبيـع الطير مَدبـوح .. كانت مِيتَه أو تَفليتَـه ولا لاحقـها وفيهـا الروح .. وبتملاها بكُل بـلاهه مَيًه تَغـرًق ألـف سطـوح .. جيت من شوقى شريتها وفوقى خَـرًت أكتر من جالونين !
شفتى يا ميمى الديك الرومى دا المتكتف ع الأقفاص .. وعليه طينه طَرًيه عجينه متلَيًط بيها ومتعاص .. واوزن وادبح ديك متكسح ديك متزَغًـط كيلو رصاص .. واما اتدَلًى فى وسط الحله فَرق السِعر طلع رِيالين !
خافـوا منَ الله يا عباد الله يا أم رتيبة ويا بن أبو عوف .. يا اللى السجن الشاق مؤبد ما يعلِمكم معنى الخوف .. يا اللى تـراب الدنيا ما يشبِع منكم عين ولا يشبع جوف .. قلنا وراكم لسه جهَنًم ، قلتوا جَهنًم روخرَه دى فين ؟!
