قالت الإعلامية سالى سالم، مقدمة برنامج "البيت"، المذاع على قناة "الناس"، ، إن مساعدة الناس والتعامل بلُطف مع الجميع، يعتبر خير دليل على أخلاقنا الجميلة.
وأشارت مقدمة برنامج "البيت"، المذاع على قناة "الناس"، اليوم الأحد، إلى دراسة جديدة أجراها أطباء الصحة النفسية حتى يعرفوا أثر التعامل بلُطف مع الإنسان على صحته، من خلال "الأفعال العفوية في اللُطف"، مضيفة: "جابوا مجموعة من الناس بتشتكي من الضغط العالي والقلق الزايد وقمسوهم مجموعتين.. وادوا لكل مجموعة منهم مبلغ كبير جدًا.. وطلبوا من أول مجموعة يصرفوا الفلوس دي على نفسهم ويعملوا كل اللي نفسهم فيه.. والمجموعة التانية طلبوا منهم إنهم يصرفوا الفلوس دي على ناس تانية خالص كأفعال عفوية في اللُطف".
وأوضحت: "النتيجة بعد ٦ أسابيع كانت مُذهلة.. أول مجموعة اللي اخدت الفلوس تصرفها على نفسها فضلت زي ما هي بدون أي تغيير نفسي.. أما المجموعة التانية اللي صرفوا الفلوس دي على أشخاص تانية وساعدوا بيها الناس واتعاملوا بُلطف مع غيرهم.. اكتشفوا إن الضغط والقلق عندهم بقى قليل... ويكاد يكون مش موجود .. مش بس كده .. الدراسة كمان أكدت إن التصرف بلُطف بيقلل من عوارض الاكتئاب... وبيخفف من الأوجاع المختلفة اللي موجودة في الجسم" .
واستكملت: "طبعًا في الفترة الأخيرة الضغط والقلق زادوا عند ناس كتير ومش عارفين يعملوا إيه.. هنا بقي العلاج موجود في دراسة (الأفعال العفوية في اللطف) اللي بتقولنا نتعامل بلُطف ازاي مع الناس.. وعلى فكرة إنت مش محتاج تعمل مجهود كبير أو وقت كتير ولا حتى تدفع فلوس.. في حاجات بسيطة أوي ممكن نعملها كل يوم.. زي إنك تبتسم في وجه الآخرين.. تقول لحد عملك حاجة شكرًا .. تساعد غيرك.. تساعد شخص كبير في السن يركب المواصلات أو المترو مثلا.. تأكل كلب أو قطة في الشارع .. أو تكلم حد بقالك كتير مكلمتوش.. تعامل زمايلك بأسلوب كويس.. أي تصرف بسيط ولطيف مع الناس حواليك .. المهم إنك كل يوم تعمل حاجة بسيطة زي دي.... دا هيفرق معاك جدًا ومع اللي حواليك .... لأن التصرفات البسيطة دي مُعدية..... يعني هتلاقي اللي أنت بتعمل معاه كده هو كمان هيقلدك وهيتعامل معاك بلُطف ومع كل الناس في حياته.. فـيالا بينا نجرب العادات دي اللي زي ما قولت بنسميها "أفعال عفوية في اللطف" ونخليها منهج حياة وجزء رئيسي من الروتين اليومي بتاعنا .. لأن دا هيفرق جدًا في صحتنا النفسية وهيأثر علي الصحة الجسدية" .
سالي سالم: تعالوا نتعامل بلطف ونزيل الهموم عنا
