حصلت "بوابة أخبار اليوم" علي أقول المتهم بقتل زميله لسرقته والشروع في قتل أخر بالمرج، وكانت عاقبت محكمة جنايات القاهرة المتهم بإحالة أوراقه لفضيلة المفتي لإبداء الرأي الشرعي في إعدامه، وحددت جلسة 23 سبتمبر المقبل للنطق بالحكم.
وفيما يلى نص التحقيقات في القضية التي جاءت كالتالي:
س/ اسمك وسنك ووظيفتك؟
اسمي أحمد سيد يوسف، 26 سنة
س/ ما هو مؤهلك الدراسي ؟
أنا أتعلمت لغاية ثالثة ابتدائي وطلعت
س/ وما هي طبيعة عملك ؟
هو أنا شغال نجار مسلح بس الدنيا زنقت في الأخر وبقيت أجيب بخور واسترزق
س/ وما هي حالتك الاجتماعية ؟
أنا مش متجوز
س/ ما صلتك بالمتوفى لرحمة مولاه / محمد عصام نور الدين؟
انا معرفش اسمه بس اعرف شکله
س/ ومنذ متى نشأت علاقتك بالمتوفى إلى رحمة مولاه/ محمد عصام نور الدین ؟
انا اعرف محمد ده من حوالي شهرين من بعد العبد اللي فات ده تقريبا
س/ وكيف نشأت علاقتك بالمتوفى لرحمة مولاه محمد عصام نور الدين ؟
هو بعد العيد الكبير اللي فات كنت قاعد في الجنينة اللي عند مدرسة الحسيني، وجه المتوفي ده ومعاه واحد ثاني اللي كان موجود في الخناقة، وهما الاتنين قعدوا في الجنينه وكانوا بيشدوا بودرة قدامي، ومن هنا اتعرفت عليهم ومن يومها نمت معاهم في الجنينه، وكان ساعتها كنت تعبان وفي واحد زميلي ادالي متوم قبل ما انام، هما الاتنين ادولي فرشة انام عليها وبعدها محستش بنفسي، قمت ثاني يوم علي الضهر وبقلب في نفسي ملقتش تليفوني وخمسون جنيه وخدوا الفرشة بتاعتي الجديدة، واختفوا ومن ساعتها وانا بدور عليهم وكنت عارف اشكالهم كويس وكنت بسال الناس عليهم عشان هما قلبوني
س/ اسرد لنا تفصيلات الواقعة ؟
هو اللي حصل اول امبارح بالليل فجر الأربعاء بعد قصة احمد توفيق والحكومة بتدور علي اللي عمل الموضوع ده حاسس ان الناس كلها بتدور عليا في الشارع فانزلت قعدت علي سايبر قريب من البيت وكانت معايا السكينة، وبعدها بحوالي نصف ساعة لمحت الاتنين اللي كانوا قلبوني في التليفون والفلوس ماشين بعربية كارو من قدام السايبر روحت خارج وراهم بسرعة وفضلت ماشي وراهم حوالي عشرة دقائق تقريبا لغاية ما وصلوا عند محل واقف قدامه ثلاثة شباب وكذا واحد تانين.
روحت مطلع السكينة وجاري ناحيتهم وقعدت النده على الشباب دول واقولهم يقفوهم ومحدش فاهم ايه اللي بيحصل لغاية ما وصلت العربية الكارو، وطلعت السكينة ورحت ضارب بيها محمد ابو تي شرت ابيض على دماغه من ورا عشان يقف ووقفوا وقلتوا طلع التليفون والفلوس اللي انتوا خدتوها مني، رد عليا ابو تي شرت ابيض وفالي تليفون ايه وراح شاتمني بأمي ومسكنا في بعض.
قام اللي قاعد جانب ابو ابيض جاب خشبة وضربني بيها علي دماغي وابو ابيض اللي هو محمد مسك ماسورة بلاستيك وضربني بيها علي كف ايدي اللي ماسك بيها السكينة، ونزلوا من علي العربية الكارو وقعدنا نلوش في بعض انا بالسكينة اللي ماسكها في وشهم عشان يبعدوا عني، وهما كل واحد فيهم كان ماسك ماسورة والثاني كان ماسك خشبة وقعدنا نلوش في بعض فترة وتهوش كل واحد بالحاجة اللي كان ماسكها قام القصير ده زقيته وقع بعيد والثاني ابو ابيض جه عليا فضلنا احنا الاتنين نضرب في بعض لحد ما القصير ده جه عليا بشومة وقعد يضرب فيا بيها قام محمد جري وجاب ماسورة حديد عشان يضريني بيها وهو كان بيضرب فيا الماسورة، وانا بهوش عليه بالسكينة ومرة واحدة رجع لورا وشتمني بامي هنا حسبنا في اديته بالسكينة، السكينة عورته بس مكنتش متأكد رحت واخد بعضي والسكينة في ادي وجريت علي طول ومعرفش ايه اللي حصله بعد كده ولسه عارف دلوقي انه توفي وده كل اللي حصل.
س / متى وأين حدثت تلك الواقعة ؟
الموضوع ده حصل فجر الاربعاء اللي فات ۲۰۲۲/۹/۲۸ حوالي الساعة ١:١٥ صباحا في شارع متفرع من شارع مدرسة الوليد امام سوبر ماركت بالمرج
س/ متى وأين تم ضبطك ؟
انا اتمسكت بعد الموضوع ده حوالي الساعة ٣:٠٠ الصبح
س/ ومن كان برفقتك آنذاك حال حدوث الواقعة ؟
كنت لواحدي
س/ كيف علمت بتواجد المتوفى لرحمة مولاه في المكان والزمان سالفي الذكر؟
انا كنت قاعد علي السايبر وشفتهم معدين صدفة من قدامي فقمت طالع وراهم
س/ وما هي المسافة الفاصلة بينك وبينهم حال تتبعك لهم ؟
كان بيني وبينهم ثلاثون متر وكنت ماشي وراهم
س/ وما هي المدة الزمنية المستغرقة من بداية تتبك لهم حتى استيقافهم ؟
انا فضلت ماشي وراهم حوالي عشرة دقائق تقريبا
س/ ولما لم تستوقفهم حال ان ابصرتهم مباشرة ؟
انا وقفتهم في الحته اللي انا وقفتهم عندها عشان يمكن اللقي حد من الناس اللي اعرفها يطلع معايا يساعدني
س /هناك شخص محدد اتفقت معه علي ان يساعدك ؟
لا انا كان عندي امل اني اللقي حد في الشارع في الحته اللي انا وقفتهم عندها أعرفه يجي يساعدني بس انا مكنتش متفق مع حد
س/ وفيما يساعدك ؟
ان هو يساعدني اني اخد تلفوني منهم والخمسين جنيه اللي اخدوها مني من شهرين
س/ اذا انت لديك العلم الكافي بخط سيرهم ؟
ج / انا كنت عارف انهم هيعدوا من الحتة دي وكنت عارف اخرهم فين
س/ ولما كنت بحوزتك السكين ؟
هو انا كنت مخبيها في البيت ونزلت بيها في الوقت ده وكنت عامل حسابي اني هقعد في السابير وكنت ناوي اتخلص من السكينة دي في أي حته بس نسيت ارميها
