صباح البسمه اللي بتغطّي ..
على الأحزان
صباح النسمه اللي بتروّح …
على الإنسان
صباح الضحكة اللي بتصحّي ..
شعاع الشمس
وتطرح ع الزمان بكره ،
وتنسى الأمس
صباح الأمل فارد دراعاته
يسابق ريح …
صباح القِمري ....
بيشقشق غنا التباريح …
صباح الورد ....
وبعطره يصيح ، ويفيح ..
صباح بيصلي ،
ويسبح ، دعا التراويح …
صباح بينادي ،
ويهادي ، ك الغُنا الشادي …
كل م يشوف طلّتك ..
بسمتك .. هنا قصادي
صباح لا بيهمه عدوى، ولا فيروس …
صباح ع العتمه ،
والضلمه برجله يدوس …
صباح بينادي ويقولك …
حياتك عيش
ورضا ربك م تنساش ..
كما الدراويش
دا بكره يا صاحبي ...
بإيد المولى تدبيره
ولو عشت عيش ...
دا الكل عايش هنا ف خيره …
