علّقت الإعلامية سهير جودة، على الشائعات حول كبار الفنانين، قائلة: "الإشاعات عاوزة مننا ايه ومروجي الإشاعات طول الوقت بيستهدفوا شخصيات مؤثرة وملهمة في حياتنا وليها جمهورها وليها وزنها وليها قيمتها، مش عارفة لية الشائعات طول الوقت بتستهدف النجم عادل إمام، وبالأمس استهدفت الفنان صلاح السعدني».
وتساءلت سهير جودة في برنامجها الذي يحمل اسم «الستات» والمذاع عبر فضائية «النهار»، قائلة: « ما سبب الإشاعات دي، مفيش احترام لحياة الناس ليه، الناس بتتجرأ على الموت نفسه مش بس على حياتهم، معقولة حتى جلال ورهبة الموت مبقتش موجودة عند الناس اللي بتنتج الاشاعات دي بسبب وبدون سبب».
وأضافت: «احمد السعدني نفى أمس شائعة وفاة والده، لكن الغريب أن أحد الشخصيات العامة هو من تداول الشائعة على صفحتة دون أن يتأكد من صحة الخبر، وبدأت الشائعة تنتشر، لذلك كان رد أحمد السعدني على الشائعة قاسي، حتى دعى على مروج الشائعة، وتعامل مع الأمر بكل عصبية لغضبه من ترويج تلك الشائعة».
وهاجمت سهير جودة مروجي الشائعات: «هتفيدك بأيه إن انت تطلع إشاعة أو تنشر خبر كاذب، ليه وازاي نتكلم ونكتب من غير دقة ومناسبة، ليه عندنا شهوة الإشاعات، مش دي الشخصية المصرية خالص، دي أبعد ما تكون عن أخلاقيات المصريين، وفكرة الإشاعات دي من أسوء ما يكون، وده فعل غير أخلاقي ومشين، والمفروض القانون يحاسب عليه، وربنا هيحاسبك عليه، احنا بقينا نستسهل فكرة الإشاعة ونصدقها أو نشيرها، كفاكم قتلاً بالاشاعات».
اقرأ أيضا|آخرهم صلاح السعدني.. شائعات الوفاة تطارد نجوم الفن| صور
