كتب: إسلام عبدالخالق
تنشر «أخبار الحوادث» نص التحقيقات مع الأم المتهمة بقتل طفلتيها الرضيعتين بوضع السم لهما في ببرونة الرضعة وإرضاعهما السم حتى فارقتا الحياة، في القضية التي أصدرت محكمة جنايات الزقازيق في محافظة الشرقية، برئاسة المستشار محمد علي عبد الرحيم، رئيس المحكمة، وعضوية المستشارين علي أحمد رجب وحسام محمد المكاوي، وسكرتارية أحمد رمزي ومحمد عبد الستار، قرارًا فيها بإحالة أوراق الأم المتهمة إلى مفتي الجمهورية، وحددت جلسة 16 أكتوبر المقبل للنطق بالحكم.
تعود تفاصيل القضية رقم 10812 جنايات مركز شرطة الحسينية لسنة 2022، والمقيدة برقم 799 جنايات كلي شمال الزقازيق لسنة 2022، إلى يوم 1 ابريل الماضي، عندما أصدرت جهات التحقيق في مركز شرطة الحسينية قرارًا بإحالة المتهمة، قمر خ أ ر، البالغة من العمر 18 سنة، إلى المحاكمة الجنائية في محكمة جنايات الزقازيق؛ على خلفية اتهامها بـ قتل المجني عليهما، نجليها، الطفلتين مكة ومليكة، رُضع، وذلك مع سبق الإصرار.
جاء في أمر إحالة المتهمة إلى المحاكمة الجنائية في محكمة جنايات الزقازيق، أنها قد بيتت النية وعقدت العزم على قتل طفليها الرُضع، وأعدت لذلك مادة سامة ووضعت المادة السامة بداخل شرابهما وأرضعتهما فلاذت روحيهما إلى بارئها كما هو مبين في تقرير الصفة التشريحية، وأن المتهمة قصدت بفعلتها تلك إزهاق روح طفلتيها وذلك على النحو المبين في التحقيقات.
حمل نص التحقيقات مع الأم المتهمة أمام النيابة الكثير من المفاجآت..؛
هذا بتاريخ 1 ابريل 2022، ولمناسبة تواجد المتهمة أمامنا شرعنا في سؤالها بالآتي، فأجابت:
- اسمي «قمر خ أ ر»، السن 18 سنة، أعمل ربة منزل، مقيمة بناحية عمارة عاطف نور الدين – حي السلام – الإسماعيلية - لا احمل تحقيق شخصية – اسم الأم «نجلاء ف أ ال».
● س: ما تفصيلات اعترافك؟
ج: اللي حصل إن أنا متجوزة «محمد ع أ ع» من أربع سنوات، وبعد كده محمد جوزي اتحبس، ولما اتحبس أنا روحت قعدت في بيت أهلي في الإسماعلية، وهناك أبويا جوزني وأنا على ذمة محمد، وجوزي من ابن مراته اسمه «صلاح خ ص»، وقعدت معاه ثمانية أشهر وحملت وبعد كده، طفشت من البيت وروحت عند بيت جوزي الأولاني، وقعدت مع حماتي، وبان عليا الحمل وهي عرفت وقالت لي أنا هاحبس أهلك علشان جوزوکي وانتي على ذمة ابني، وبعدها جوزي الأولاني طلع من السجن وعرف وراح اتخانق مع أبويا ومسكوا في بعض، وبعد كده اتحبس تاني، وأنا خلفت مليكة ومكة وهو في السجن لأنه دخل تاني السجن، ولما خرج من السجن قال أنا هسجلهم باسمي لما نكتب رسمي علشان أنا كنت لسه مكملتش السن، وبعد كده أخدنا شقة إيجار أنا وجوزي «محمد ع أ» في الإسماعيلية في الكيلو 7 في عزبة أبو ناجي، ومن أسبوع حماتي جت لنا زيارة في الإسماعيلية، وكنا بنلم خردة هناك وهي معانا، وهي لقت كيس بتاع سم حشرات لونه أصفر موجود في الزبالة، وأخدته وإمبارح أنا وجوزي جينا مع حماتي في الشقة بتاعتها في المساكن اللي عند مدرسة الصنايع في الحسينية في الشرقية، وبعد كده أنا شوفت الكيس بتاع السم في وسط اللبس بتاعها، ولما شوفته قولت لها أنا عاوزة السم علشان أرش بيه حوالين المرتبة اللي بنام عليها علشان الحشرات، وأخدته منها وروحت جايبة السم وحطيته في الببرونتين اللي بعمل فيهم اللبن بتاع أولادي وأرضعهم بيهم، وبعد ما حطيت السم روحت مرضعة العيال وكان جوزي نايم ومغطي وشه وما شافنيش وأنا بحط السم، وبعد ما شربتهم السم اللي أنا حطاه روحت قایمة وغاسلة الببرونات وحطيت فيها لبن علشان محدش يعرف حاجة، وجيت أرضع العيال تاني مرضيوش يرضعوا روحت سايباهم ونمت، ولما صحيت الصبح لقيت بنتي مكة ما بتطلعش نفس وميتة جنبي، ومليكة بتتحرك ومش بتعيط، وحماتي دخلت عليا الصبح تشوف العيال لقيت واحدة ميتة والتانية فيها الروح، وقالت لي تعالي نروح بيها المستشفى، ومكة اللي ماتت سيبناها في البيت مع جوزي لحد ما نرجع من المستشفى، ولما روحنا المستشفى ملحقوهاش وماتت والحكومة خدتني أنا وحماتي على المركز، وأنا قعدت أقول لهم على حاجة ومرضيتش أقول لهم على البيت، علشان حماتي قالت لي ما تقوليش على البيت لأنهم هيلاقوا التانية ميتة هناك وهنتحبس، لكن في الآخر قولت على كل حاجة وروحت مع الحكومة على البيت ولقيوا جوزي ولقيوا مكة ميتة وشافوا كيس السم والببرونات، وجوزي كان رايح يجيب لبنتي مكة كفن ولما رجع خدوه معانا، وكان موجود واحد اسمه محمود بيشتغل مع حماتي وكان عاوز يتجوزها وخدوه معانا، وده كل اللي حصل.
● س: متى وأين حدث ذلك؟
ج: أنا اديت السم لعيالي في اللبن الساعه 11 مساء يوم 31 مارس 2022 في شقة حماتي، ونمت وصحيت الساعة السابعة صباحًا لقيت مكة ماتت ومليكة بتطلع في الروح، وروحت بمليكة المستشفى الساعة كانت الساعة التاسعة صباحًا، وقالوا ماتت الساعة الواحدة مساء النهاردة 1 ابريل 2022.
● س: من كان برفقتك آنذاك؟
ج: كنت أنا وجوزي مع حماتي وواحد اسمه محمود، معرفش اسمه بالكامل إيه.
● س: وهل قمتِ بإثبات قيد بناتك عقب ولادتكِ لهم؟
ج: لا علشان هما ولادي من «صلاح خ ص» اللي أبويا خلاني أتجوزه عرفي بعد ما جوزي محمد دخل السجن.
● س: وما هو الوقت المستغرق في ارتكابك لتلك الواقعة؟
ج: أنا أخدت حوالي ساعتين من أول ما جبت الكيس لعند ما رضعتهم.
● س: ومتى وردت إليك فكرة التخلص من ابنتيك تحديدًا؟
ج: من أول ما اتولدوا وأنا عاوزة أتخلص منهم ومش عارفة أخلص منهم إزاي، ولما شوفت السم فكرت إني أحطهولهم في اللبن علشان محدش يعرف وأكون اتخلصت منهم.
● س: وما هو وصف الكيس الذي يحوي المادة السامة تحديدًا؟
ج: هو كيس متوسط الحجم لونه أصفر ومكتوب عليه كلام إنجليزي باللون الأسود، وليه فتحة من الجنب والفتحة دي ليها غطاء أبيض.
ملحوظة: حيث قمنا بعرض الكيس المتحفظ عليه بمعرفتنا من مكان الواقعة على الماثلة أمامنا - المتهمة - فأقرت أنه ذات الكيس التي قامت باستخدام ما بداخله من ماده سمراء اللون في ارتكاب الواقعة محل التحقيق.
● س: وما هي الأدوات التي قمتي باستخدامها في الواقعة محل التحقيق؟
ج: الكيس اللي فيه المادة السمرا، والببرونات اللي حطيت فيها اللبن، واللبن السايب اللي دوبت بيه المادة السمرا دي.
● س: وما هو وصف المادة بداخل ذلك الكيس تحديدًا؟
ج: هي مادة سودا عاملة زي البودرة.
● س: وما هو المقدار الذي قمتي بوضعه داخل كل ببرونة من تلك المادة تحديدًا؟
ج: أنا فضيت بالكيس وحطيت شوية معرفش قد إيه بالضبط لأني كنت ببص على الباب لحد يدخل عليا ويشوفني.
● س: وهل أنتِ على علم مسبق بأن المادة الموجوده بذلك الكيس مادة سامة؟
ج: أنا عرفت إنه سم حشرات.
● س: وهل كنتِ على علم بأن تلك المادة مادة قاتلة تؤدي بحياة أطفالك؟
ج: أيوه عارفة انه سم الحشرات بيموت.
● س: وما هو الدافع وراء ارتكابك لتلك الواقعه تحديدًا؟
ج: علشان أنا عاوزه أخلص منهم من ساعة لما اتولدو علشان مش ملاحقه عليهم مصاريف ومش عارفه أشتغل بيهم وأصرف عليهم حتى، وجوزى ساعات يصرف عليهم وساعات ما بيكونش معاه فلوس ومش عارف يصرف عليهم، وعلشان كده أنا فكرت أتخلص منهم.
● س: وهل اشترك أحد معك في ارتكاب الواقعة؟
ج: لا.
● س: وهل كان كلا من زوجك المدعو «محمد ع أ ع» ووالدته «كوثر م م ع» على علم بارتكابك لتلك الواقعة؟
ج: أنا عملت كده من وراهم.
● س: وما قولك فيما قررته استدلالًا بتاريخ 1 أبريل 2022 المحرر بمعرفة أمين شرطة «م ع» من أن نجلتك «مليكة محمد ع» عانت من تعب وقمتِ باصطحابها إلى المستشفى وتوفت على أثر ذلك وعدتٍ وقررت بمحضر جمع الاستدلالات المسطر بمعرفة الرائد «م ث» بذات التاريخ بارتكابك الواقعة محل التحقيق؟
ج: علشان حماتي قالت لي أقول كده في الأول علشان ما نتحبسش، بس أنا لما سألوني تاني قولت على كل حاجة وأخدتهم للبيت اللي فيه بنتي اللي ماتت التانية مكة.
● س: وما الدافع وراء إدلاء المدعوة «كوثر م م ع» لكِ بتلك الأقوال السالفة الذكر؟
ج: علشان هي قالت لي إن البنات ملهمش شهادات ميلاد، وقالت لي أقول كده علشان ما نتحبسش.
● س: هل لديكِ ثمة سوابق؟
ج: لا معنديش سوابق.
● س: أنتِ متهمة بقتل المجني عليهما «مكة محمد ع أ ع» و«مليكة محمد ع أ ع» عمدًا مع سبق الإصرار والترصد بأن بيتي النية وعقدتي العزم على قتلهم بأن وضعتي جوهرًا سامًا وهو مبيد حشري والذي يتسبب عنه الموت العاجل في طعامهما وما أن تناولتهما أودت بحياتهما قاصدة من ذلك إزهاق روحهما على النحو المبين بالتحقيقات؟
ج: أيوة أنا عملت كده.
