أكد أحمد الجندي لاعب منتخب مصر في الخماسي الحديث إنهاء الأزمة التي آثارها عبر صفحته الرسمية بموقع التواصل الاجتماعي فيسبوك بشأن "ركنه سيارته الخاصة" في باركنج استاد القاهرة قبل تدريباته.
وغرد أحمد الجندي عبر صفحته الشخصية بموقع التواصل الاجتماعي فيسبوك قائلا:" تعقيبًا على ما تم نشره صباح اليوم بخصوص parking الاستاد تواصل معي وزير الشباب و الرياضة هاتفيًا و ادارة الاستاد و توضيح المشكلة "بغلطة" في التعليمات و اود ان اشكر الدكتور/ أشرف صبحي على اهتمامه و سرعة حل الموضوع".
وتابع :" زي ما قلت ان المشكلة ده لا اربطها تمامًا بموضوع "محمد الشوربجي" و لكنها مشكلة شخصية و مش حابب تتكرر معايا تاني و مكنتش حابب اضيع حقي برضه لإن الموضوع بالنسبالي مش اني أحمد الجندي اللي جايب ميدالية أوليمبية و لكن بصفتي لاعب في المنتخب و نيابة عنهم كان لازم اتكلم عن اللي حصل و حابب أشكر كل الناس اللي اهتمت بالموضوع و ساعدوا في حلها"
وكان اللعب الحاصل علي فضية دورة الألعاب الأولمبية بطوكيو الأخيرة قد نشر صباح اليوم قائلا :" حصل موقف انهاردة عند مجمع حمامات السباحة باستاد القاهرة الساعة ٦ الصبح و انا داخل التمرين الأمن قال لي ان في تعليمات بعدم دخول العربيات للparking المخصص لحمام السباحة و لا حتى الركنة في محيط الباب الخارجي للجراچ يعني لو عايز تركن يبقى تروح تركن بعيد عن الباب بحوالي ١٠٠ متر يعني انت محتاجلك حوالي من ١٠ ل ١٥ دقيقة عشان توصل لحمام السباحة نفسه بسبب مسافة الparking الكبيرة أساسًا
وتابع :" ف المهم بسأل الأمن ليه التعليمات ده قال لي أصل في "مسؤول" كان داخل حمام السباحة امبارح الثلاثاء "اتعطل ١٢ دقيقة"!!! فالدنيا اتقلبت و "المسؤول" قرر انه يعاقب الكل ان مفيش عربيات تدخل الparking اللي بياخد حوالي ٢٠٠ عربية بدون عمل اي اعتبار ان دة لاعب منتخب و لا اي حاجة و مش بس كدة لا، دة كمان محدش يركن في محيط الباب الخارجي أصلًا اللي هو انا بعاقبك انك هتدخل بشنط التمرين ١٥ دقيقة مشي الساعة ٦ الصبح و تتأخر على تمرينك عشان "انا المسؤول" اركن مكان ال٢٠٠ عربية. يعني انا ابقى صاحي ٥ الصبح و ورايا يوم طويل عشان اروح مكان التمرين اللي هو أصلا المفروض تبقى كل حاجة متسهلة فيه مش بنقول بقى دة موقف في الشارع ف طبيعي انه يحصل، و مع كامل احترامي الفكرة ان "المسؤول" ده المفروض انه عارف قد ايه ان اللاعب بيبقى الصبح صاحي مش شايف قدامه من قلة النوم او المجهود فبدل متيسرله تمرينه لا احنا نعطله أكتر.
واختتم الجندي حديثة :" أنا مش هربط الموضوع دة بموضوع "محمد الشوربجي" لاعب الاسكواش لإن المشكلة ده تعتبر نقطة في بحر و ممكن اي حد تاني يشوفها مش مستاهلة و لا اي حاجة لكن لا اي حد بيلعب رياضة بشكل محترف هيفهم النقطة في ان كل واحد فينا مبيصدق يلاقي حاجة تريحه يعني انا لو عليا كنت ركنت عربيتي مكان الstart بتاع حمام السباحة".
