قال الدكتور عمرو الورداني، أمين الفتوى بدار الإفتاء المصرية: "لكي تخرج أحسن ما في الناس، اديله فرصة، متكبسش عليهم، وتحسسه إنه متهم، الزوج لما يحس إنه متهم ممكن يستخدم العنف، الزوجة لما تحس إن زوجها مش فاهمها تخرج عن السيطرة".
وأضاف الورداني، خلال تقديم برنامج "ولا تعسروا" المذاع على القناة "الأولى"، "اعطوا فرصة للناس تعبر عن نفسها، وأنت بتتعامل مع الناس اديلهم فرصة متحسسهمش إنهم متهمين، فرصة تقول الحقيقة وهي مش مكسوفة تقولها، وأنتوا بتسمعوا الناس ميبقاش همكم تبينوا اد ايه هم مقصرين".
ونصح الورداني الزوج، بالاستماع لزوجته وشكرها على النصيحة، لا تعنيفها، مردفًا: "الزوجة لو ممكن تقول لزوجها لو قلت العبارة بشكل مختلف مكنش هيضايقني، يقولها شكرا النقطة دي مخدتش بالي منها، ربنا يبارك لي فيكي، لازم ناخد كلام الناس بصدر رحب".
وختم الورداني: "خلي الجوهر يطلع، أحسن جوهر هو الطيابة، متخافش تبقى طيب، حاول تكون صادق وخدوم وحنين على الناس، يجب أن نكون قادرين نملك نفسنا ولا نحكم على الناس ونشوف نفسنا بعيون الجمال".
اقرأ أيضاً | ما حكم قراءة القرآن بدون وضوء؟ «الإفتاء» تُجيب
