التحيز لأحد الأطراف يعد تطرف، بمعنى أوضح إننا ماينفعش ننكر دور واحد منهما، يعنى مثلا الراجل بيشقى ويتعب علشان يوفر متطلبات عائلته، وبيكون بردوا الثواب والعقاب لأبنائه، وكمان بيكون هو العمود الفقرى للأسرة، وبيكون الأمن والأمان لزوجته وأولاده وكمان أهله.
الأب بيكون زى الدرع الواقى أو الجبل، الأب بالنسبة لأولاده كل شئ فى الحياة وبيكون للولد القدوة فى التعامل مع البشر والسند فى الدنيا، والبنت هو أول راجل تعرفه فى حياتها، وفى بعض الأحيان بيكون المقياس لها فى اختياراتها المستقبلية لشريك حياتها، وطبعًا هو الدلع كله، وبيكون لزوجته السند اللى دائما معها، وبيكون لأبوه وأمه وإخواته العكاز.
أما الست فهى أساس البيت، مش تطبيل بس ما تيجى نحسبها كدا حسبة سريعة، مين فينا يقدر يوفى حق أمه! الأم هى اللى بتربى وبتعلم وبتعمل كل حاجة فى البيت وكمان لو هى بتشتغل لك أن تتخيل إنها بتشتغل وتربى وتوفى متطلبات بيتها كامل سواء للزوج والأولاد وكمان ضيف عليها واجبها ناحية أهلها اللى ماينفعش تقصر معاهم هما كمان.
الابن بيشوف حاجة فى أمه بيفضل يدور عليها فى شريكة حياته، وبالنسبة لبنتها بتكون الأم هى الدليل فى التعامل فى الحياة الزوجية والمرشد للمستقبل وكيفية التعامل معاه، ودور الأم لو اتكلمنا عنه لازم نكرمها طوال الحياة مش يوم واحد بس، وماننساش إن فى بيوت بيكون الراجل هو الأب والأم وبيوت بتكون الست هى الأب والأم.
بالمختصر.. المفيد الراجل والست ميزان الحياة ونجاحهما بوجودهما مع بعض.. وكل سنة وكل أمهاتنا بخير.. ربنا يخليكى يا أمى ويبارك فيك يا أبى.
