ماجد فياض
أنا بقالى مدة مزاجى كارف ونفسيتى مشحرة.. وكل ما أدورها تقطع، وتطفى منى !!
صحيح أنا لفيت الدفة ناحية الشمال الشرقى مع اتجاه أشعة الشمس زى ما قلت لى فى الحظر اللى فات وأخدت شاور دافى؛ وفطرت - اه والله فطرت ودى حاجة معملتهاش من أولى أول، وكمان لبست الجاكت اللى أنت عارفه الواقى ضد الهرى والهبد، والجذب والشد، وقللت سرعة المناهدة والجدال والزهق، والانفعال.
لسه فاكر كلامك اللى فات إن النفسية عاملة زى الموتور كل ما تكاركله يشرق.... تكبس له يفتح.!!
انا كبست على الموتور وأبشرك إن النفسية طفت خالص ومبتعملش أى صوت، وحاجة آخر حسبى الله ونعم الوكيل فيك يا فخري! رغم أن موتور نفسيتى باركيز أصلى زى ما سيبته بحطة إيديك، مش معقول يعنى الباركيز بقى لا بيفتح ولا بيشرق وأنه بس بيعطل!!
عزيزى سانتا الحياة بقى فيها كثير مما لا أطيق، وضياع الطريق، وحسد الرفيق، وآلآم الفقد، والخوازيق. وكثير أوى من المعلش، والتدليس والغش،واللى يبيعك علشان القرش، صحيح فيها فاصل من السعادة، بحاول والله اغتنمها بزيادة، واجتهد شوية فى العبادة، واحط همومى تحت الوسادة..... وأقول لنفسى عدى يومينك يا حمادة.
عزيزى سانتا من فضلك شوف لى السنة دى حد من أصحابك يكون شغال فى الطاقة الإيجابية أو الشمسية أو حتى الذرية لأن واللى خلقك يا غالى انا بعانى من تضخم حاسة الوجع وانهيار حاسة الشبع وفقدان حاسة الدلع ! وأنت سايبنى كده ؟ طيب والله عيب عليك يا جدع.
