نشرت الإعلامية أسماء مصطفي، تدوينة جديدة لها عبر صفحتها على موقع التواصل الاجتماعي «فيس بوك»، تناولت فيه أسباب عدم حديثها عن تجربتها مع مرض السرطان.
وكتبت أسماء قائلة ""مساء الخيرات عليكم وتحياتى وشكرى لكل الناس الجميلة على الصفحة ردا على سوال بتساله كتير جدا، هو أن ليه مش بحكى تجربتى وتفاصيل المعركة مع المرض اللعين مع أن في ناس كتير عملت كده وأن ده مهم علشان غيرى يستفيد، الإجابة ببساطة أنى طبعا مقتنعة ومدركة باهمية أن مريض السرطان بيقدر يفيد غيره بتجربته وبيكون فعلا فيها امور كتيرة واحيانا معقدة جدا، بس انا ما زالت فى هذه المحنة وحتى الآن واللحظة معنديش جديد غير انى منتظرة انى مع الفحص الجاى باذن الله الاقى استجابة للعلاج واكيد باذن الله لما ربنا يكتبلى الشفاء من عنده هطلع واقول واتكلم معاكم كتير نفسى اكون مفيدة فعلا للناس بس حاليا مينفعش"،
"الحاجة الثانية زى ما وضحت قبل كده ده مرض ملوش كتالوج في ناس نفس حالتى وكانت ظروفهم افضل منى وفى العكس طبعا، الشئ الاهم الى هنصح بيه وبكرره مفيش حالة زى الثانية حتى لو كانت نفس الاصابة لان جسمنا مش واحد ولا هنعانى نفس الأعراض، لا انواع السرطان واحدة ولا العلاجات واحدة ولا الاجسام واحدة ، علشان كده بلاش تبادل خبرات الادوية لان دى يحددها الطبيب المختص فقط حسب كل شخص"
"وفي حالات معقدة زى حالاتى بتاخد اكثر من نوع علاج كيمو مع بعض وكل شوية تعديل رجاء نخلى بالنا نتوكل على الله وناخد بالاسباب وربنا كريم. وان شاء الله اقابلكم على خير وبعتذر على الايف فى الظروف الحالية صعب لاني عاوزاكم تشوفوني كويسة وده نقطة تانية اكيد هنتكلم بردوا عنها وهي نظرة الأخرين لمريض السرطان بعد ما المرض والكيمو يفترسوه وربنا يهونها من عنده".
كانت الإعلامية أسماء مصطفى قد أعلنت، في وقت سابق، إصابتها بـ السرطان مشيرةً إلى أنَّه تسبب في ابتعادها عن الناس منذ أشهر، وأن هذا الغياب سيطول بسبب رحلة العلاج.
وتُعد أسماء مصطفى صحفية وإعلامية معروفة، تقدم برنامج "هذا الصباح" و هو أحد برامج التوك شو الصباحية، عبر قناة "اكسترا نيوز".
